महेन्द्रनगर । अखिल नेपाल जनजाती सम्मेलन कञ्चनपुरले २१ औं कमैया मुक्ति दिवसको शुभकामना दिएको छ । सम्मेलनका जिल्ला अध्यक्ष राजकुमार चौधरीले शुक्रबार विज्ञप्ति प्रकाशित गरी मुक्ति दिवसको शुभकामना दिनुभएको हो ।
वि.स.२०५७ साउन २ गते सरकारले कमैया मुक्तिको घोषणा गरेको थियो । त्यस यता हरेक बर्ष साउन २ लाई मुक्त कमैया दिवस मनाउने चलन छ । आज साउन २ गते कमैया मुक्तिको घोषणा भएको २० वर्ष पूरा भई २१ औं वर्षमा प्रबेश गरेको छ ।
सम्मेलनले २१ औं मुक्त कमैया दिवसबाट सम्पूर्ण न्यायप्रेमी जनसमुदायहरुमा सबै खाले दासता र अन्याय, शोषण, दमनका विरुद्धमा संघर्ष गर्न प्रेरणा मिलोस् भन्ने शुभकामना व्यक्त गरेको छ ।
अखिल नेपाल जनजाती सम्मेलनले कमैया मुक्ति तथा मुक्ति पछिको व्यवस्थापनका लागि निरन्तर संघर्ष गर्दै आएको छ । गत वर्ष मात्रै सम्मेलनले मुक्त कमैयाको उचित व्यवस्थापनको माग गर्दै ‘कञ्चनपुर–दाङ अभियान’ सञ्चालन गरेको थियो ।
