काठमाडौँ । अमरज्योतिको अङ्क ६८ र मातृका पोखरेलको कथासङ्ग्रह ‘मलाई पनि निद्रा लागेन’ विमोचन भएको छ ।
नेपाल विद्युत् प्राधिकरणको रुफटप हलमा २०८२ पुस २५ गते शुक्रबार आयोजित एक कार्यक्रममाझ दुई कृति विमोचन भएका हुन् ।
कार्यक्रममा वरिष्ठ साहित्यकार नगेन्द्रराज शर्मा र अन्य अतिथिद्वारा संयुक्त रूपमा ती कृतिको विमोचन गरिएको थियो ।
सो अवसरमा मन्तव्य राख्दै शर्माले साहित्यिक पत्रकारिता अहिले पनि सङ्कटपूर्ण अवस्थाबाट गुज्रिरहेको दाबी गर्नुभयो ।
उहाँले भन्नुभयो– ‘लहड र सनकको भरमा साहित्यिक पत्रकारिता चलेको छ ।’
शर्माले साहित्यिक पत्रकारिता समाजसेवाको एउटा माध्यम रहेको पनि स्पष्ट पार्नुभयो ।
कार्यक्रममा २०८२ मङ्सिर महिनाको ‘साहित्यक पत्रकारिता विशेषाङ्क’ को समीक्षा श्रीराम श्रेष्ठ ‘रोदन’ ले गर्नुभएको थियो भने कथासङ्ग्रहको समीक्षा डा. हरि सिलवालले गर्नुभएको थियो ।
कार्यक्रममा कथाकार मातृका पोखरेलले आफ्नो कृतिको बारेमा र उपकार्यकारी निर्देशक तुलाराम गिरी अमरज्योति साहित्यिक त्रैमासिकको बारेमा मन्तव्य राख्नुभएको थियो ।
पत्रिकाका प्रधान सम्पादक विष्णुप्रसाद आचार्य ‘अतृप्त’ को अध्यक्षता तथा कार्यकारी सम्पादक युवराज शर्माको सञ्चालनमा अघि बढेको सो कार्यक्रममा उपस्थित सहभागीलाई शारदा पराजुलीले स्वागत गर्नुभएको थियो ।
कार्यक्रममा अतिथिहरूलाई मायाको चिनो प्रदान गरिएको थियो ।
