शङ्करप्रसाद पोख्रेल, बुटवल ।
अर्घाखाँची भूमिकास्थान नगरपालिका र नेपाल रेडक्रस सोसाइटी रुपन्देहीबिच नगरपालिकाका बासिन्दालाई रगत उपलब्ध गराउने सम्झौता भएको छ । सो सम्झौता २०८२ पुस २ गते बुधबार रुपन्देहीको भैरहवामा सम्पन्न भएको हो ।
सम्झौताअनुसार भूमिकास्थान नगरपालिकाका बासिन्दाले रेडक्रस रुपन्देहीअन्तर्गत सञ्चालित रक्तसञ्चार सेवा केन्द्र (ब्लड बैङ्क) बाट रगत प्राप्त गर्न सक्नेछन् । सेवा उपलब्ध गराएबापत नगरपालिकाले प्रतियुनिट नौ सय ५० रुपैयाँ सेवा शुल्क नेपाल रेडक्रस सोसाइटीलाई भुक्तानी गर्ने व्यवस्था गरिएको छ ।
सम्झौतामा रक्तसञ्चार सेवाको खर्च विवरणसहितको प्रतिवेदन प्रत्येक त्रैमासिक १५ गतेभित्र बिलसहित नगरपालिकामा पेस गर्नुपर्ने उल्लेख छ । साथै सेवा प्रदान गर्दा बिरामीको नामावली, उपलब्ध गराइएको रगतको किसिम तथा लागेको शुल्कसहित आवश्यक कागजात संलग्न गर्नुपर्ने प्रावधान राखिएको छ ।
रगत लिन नगरपालिकाको बासिन्दा भएको प्रमाण खुल्ने कागजात† जस्तै : नागरिकता, राष्ट्रिय परिचयपत्र, मतदाता परिचयपत्र, बसाइँसराइ प्रमाण, सवारी चालक अनुमतिपत्र, राहदानी, जन्मदर्ता वा विवाहदर्ता पेस गर्नुपर्नेछ । आकस्मिक अवस्थामा कागजात तत्काल पेस गर्न नसकेमा पहिले सेवा शुल्क बुझाइ २४ घण्टाभित्र कागजात पेस गरेमा उक्त रकम फिर्ता गरिने व्यवस्था गरिएको छ ।
सम्झौताअनुसार अस्पतालका लागि लगिएको रगत प्रयोग नभएमा २४ घण्टाभित्र बैङ्कमा फिर्ता गर्नुपर्नेछ । साथै नगरपालिकाले वार्षिक कार्ययोजना तयार गरी कम्तीमा वर्षमा दुईपटक नेपाल रेडक्रसको प्राविधिक सहयोगमा रक्तदान कार्यक्रम आयोजना गर्ने प्रतिबद्धता जनाएको छ ।
रक्तसञ्चार सेवा सहज र निरन्तर बनाउन नगरपालिकाले अग्रिम रूपमा एक लाख रुपैयाँ नेपाल रेडक्रस सोसाइटीमा जम्मा गर्ने र उक्त रकम २० प्रतिशतभन्दा कम भएमा पुन: रकम थप गर्ने प्रावधान पनि सम्झौतामा समावेश गरिएको छ ।
सम्झौता समारोहमा बोल्दै भुमिकास्थान नगरपालिकाका नगर प्रमुख झबिलाल थापाले यो सम्झौताले नगरबासीको जीवनरक्षा गर्न महत्त्वपूर्ण भूमिका खेल्ने विश्वास व्यक्त गर्नुभयो ।
उहाँले भन्नुभयो– ‘रक्त अभावका कारण कुनै पनि नागरिकले उपचारबाट वञ्चित हुन नपरोस् भन्ने हाम्रो लक्ष्य हो । यस सम्झौतामार्फत भूमिकास्थान नगरपालिकाका नागरिकले सहज, सुरक्षित र नि:शुल्क रक्तसेवा पाउने व्यवस्था गरिएको छ । आगामी दिनमा रक्तदान संस्कृतिलाई अझ सशक्त बनाउँदै लैजानेछौँ ।’
सम्झौतामा राष्ट्रिय जनस्वास्थ्य प्रयोगशालाबाट समयसमयमा तोकिएको रक्तसेवा शुल्क परिमार्जन भएमा सोहीअनुसार लागु हुने उल्लेख छ । आपसी सहमतिमा सम्झौताको अवधि तथा शर्त थपघट गर्न सकिने र प्रत्येक वर्ष कम्तीमा एक पटक दुवै पक्षको सहभागितामा समीक्षा बैठक आयोजना गर्ने सहमति पनि भएको छ । सम्झौता २०८३ असार मसान्तसम्म लागु हुनेछ ।
सम्झौतामा नगरपालिकाको तर्फबाट नगरप्रमुख झबिलाल थापा र रेडक्रस रुपन्देहीको तर्फबाट सभापति रामचन्द्र उपाध्यायले हस्ताक्षर गर्नुभयो । साक्षीका रूपमा स्वास्थ्य शाखा प्रमुख सुरेशप्रसाद गैरे तथा रक्तसञ्चार सेवा समिति रुपन्देहीका संयोजक सुशील गुरुङ रहनुभएको छ।
सो अवसरमा भूमिकास्थान घर भई हाल बुटवल बसोबास गर्दै आउनुभएका समाजसेवी उमलाल बन्जाडे, गोपाल बन्जाडे, ज्ञानु पाण्डे, रामप्रसाद भुसाल, लक्ष्मण बेलबासेलगायतको उपस्थिति रहेको थियो ।
