टेकराज भुसाल, खलङ्गा ।
मल्लरानी–३ बर्बोट, प्युठानस्थित भानुभक्त माध्यमिक विद्यालयको पचासौँ वार्षिकोत्सव उद्घाटन सम्पन्न भएको छ ।
२०८२ मङ्सिर २९ गते सोमबार एक औपचारिक समारोहमाझ सो कार्यक्रम सम्पन्न भएको हो ।
सो समारोह लुम्बिनी प्रदेश सरकारका सहरी विकास तथा खानेपानीमन्त्री सरोज थापा (रोज राणा) को प्रमुख आतिथ्यमा सम्पन्न भएको थियो ।
कार्यक्रममा मल्लरानी गाउँपालिकाका अध्यक्ष कृष्णबहादुर खड्काको विशेष आतिथ्य रहेको थियो ।
समारोहलाई सम्बोधन गर्दै मन्त्री थापाले भानुभक्त माविले विगतदेखि ग्रामीण क्षेत्रमा गुणस्तरीय शिक्षा प्रदान गर्दै दक्ष जनशक्ति उत्पादनमा महत्त्वपूर्ण योगदान पुर्याएको उल्लेख गर्नुभयो ।
कार्यक्रमका अध्यक्ष तथा विद्यालय व्यवस्थापन समिति अध्यक्ष जीवलाल खत्रीले विद्यालय स्थापनादेखि हालसम्मको यात्रा, उपलब्धि र चुनौतीबारे प्रकाश पार्दै सबै सरोकारवालाको सहयोगले विद्यालय यहाँसम्म आइपुगेको बताउनुभयो ।
वार्षिकोत्सव पुस २ गतेसम्म सञ्चालन हुनेछ ।
पुस १ गते पूर्वशिक्षक तथा विद्यार्थीको पुनर्मिलन तथा सांस्कृतिक कार्यक्रम आयोजना गरिएको छ भने पुस २ गते विविध कार्यक्रमसहित वार्षिकोत्सव समापन गरिनेछ ।
सो अवसरमा विभिन्न शैक्षिक, सांस्कृतिक तथा स्मरणीय कार्यक्रम आयोजना गरी आफ्नो इतिहासलाई स्मरण गरेको आयोजकले बताएको छ ।
