काठमाडौँ । ज्ञानशाला अनुसन्धान केन्द्रले काठमाडौँ जिल्लास्तरीय निबन्ध प्रतियोगिता सम्पन्न गरेको छ ।
नेपाल प्रज्ञा–प्रतिष्ठानका सदस्यसचिव डा. धनप्रसाद सुवेदीको प्रमुख आतिथ्यमा २०८२ मङ्सिर २७ गते म्हेपीस्थित गण्डकी कलेजमा सो कार्यक्रम सम्पन्न भएको हो ।
सो अवसरमा मन्तव्य राख्दै प्रमुख अतिथि सुवेदीले आफू पनि प्राध्यापन पेसाबाट साहित्यलेखन हुँदै अगाडि बढेको र कथा, कविता, निबन्धलेखनजस्ता कार्यक्रमले लुकेर रहेका अन्तरनिहित प्रतिभा पहिचान गर्न र साहित्य तथा शैक्षिक, सामाजिक कार्यमा प्रोत्साहनमा सहयोग गर्ने बताए ।
केन्द्रका अध्यक्ष भोलानाथ ढकालको प्रमुख आतिथ्यमा सम्पन्न उक्तm कार्यक्रममा कक्षा ९ र १० मा अध्ययनरत विद्यार्थीले भाग लिएका थिए ।
प्रतियोगतामा सरस्वती माध्यमिक विद्यालय क्षेत्रपाटीकी छात्रा आर्या शाक्य प्रथम, फ्युचर स्टार मावि छाउनीकी छात्रा श्रीया पराजुली द्वितीय, अमृत मावि म्हेपीकी छात्रा सफलता बराल तृतीय भएकी थिइन् ।
त्यस्तै हिमरश्मि माविकी छात्रा प्रतिक्षा गौतम र प्रारम्भ माविकी छात्रा दिविशा सापकोटाले सान्त्वना पुरस्कार जितेका थिए ।
प्रथम, द्वितीय, तृतीय र सान्त्वना पुरस्कार जितेकालाई प्रमुख अतिथि डा. सुवेदीको हातबाट क्रमश: रु. १० हजार, रु सात हजार पाँच सय, रु पाँच हजार तथा दुई हजार पाँच सयका दरले नगद पुरस्कार, कप र प्रमाणपत्र प्रदान गरिएको थियो ।
प्रतियोगिताको निर्णायक मण्डलमा साहित्यकार नवराज रिजाल, शेखर अर्याल र नारायण निरासी रहेका थिए ।
कार्यक्रममा काठमाडौँका २७ विद्यालयका ५२ जना विद्यार्थीको सहभागिता रहेको आयोजकले जनाएको छ ।
सो अवसरमा शिक्षाविद् मनोजकुमार श्रेष्ठ, डा. चूडा ढकाल, गण्डकी कलेजका प्राचार्य शिशिर अर्याल, साहित्यकार तथा विषयविज्ञ नवराज अर्याल, पत्रकार शुकदेव दाहाललगायतका व्यक्तित्वको आतिथ्य रहेको थियो ।
विष्णुहरि देवकोटाको सञ्चालनमा अघि बढेको कार्यक्रममा गण्डकी कलेजका डाइरेक्टर द्रोणप्रसाद अधिकारीले स्वागत गरेका थिए ।
कार्यक्रममा किडस् पावर इन्टरनेसनलका प्रशिक्षक शुष्मा पोखरेलले सुरक्षा सिपसम्बन्धी कार्यक्रममार्फत महत्त्वपूर्ण प्रशिक्षण दिएकी थिइन् ।
२०८१ सालमा स्थापना भएको ज्ञानशालाले बेलाबखत विद्यालयस्तरीय वक्तृत्वकला, हस्तलेखन निबन्ध प्रतियोगिता, मनोपरामर्श तथा अन्य विभिन्न विषयमा तालिम प्रदान गर्दै आएको अध्यक्ष ढकालले जानकारी दिए ।
