काठमाडौँ । नेपाल विद्युत् प्राधिकरण, विद्युतकर्मी साहित्यिक समाजले ‘त्वदीयं वस्तु गोविन्द, तुभ्यमेव समर्पये’ नामक साहित्यिक कार्यक्रममार्फत वरिष्ठ साहित्यकार पुष्कर लोहनीको साहित्यिक योगदानको स्मरण गरेको छ ।

समाजका अध्यक्ष विष्णु आचार्य अतृप्तको अध्यक्षता तथा अग्रज साहित्यकार लोहनीको प्रमुख आतिथ्यमा घट्टेकुलो, काठमाडौँस्थित महापुष्कर सभाकक्षमा २०८२ मङ्सिर २६ गते शुक्रबार साँझ उक्त कार्यक्रम सम्पन्न भएको हो ।

कार्यक्रममा विशेष अतिथि नई एकेडेमीका कुलपति इन्दिरा प्रसाईं, अन्य अतिथि वरिष्ठ साहित्यकार तथा शारदा मासिकका सम्पादक विमल भौकाजी, निबन्धकार श्रीबाबु कार्की, भाषा आयोगका माननीय सदस्य मातृका पोखरेल गायतको उपस्थिति रहेको थियो।

त्यस्तै, विद्युत्कर्मी साहित्यिक समाजका पूर्व अध्यक्षहरू कुलप्रसाद पराजुली, केशव रूपाखेती, विष्णुबहादुर सिंह, पुण्य घिमिरे, रामेश्वर राउत ‘मातृदास’ र कृष्णदेव रिमाल ‘शब्दसेना’, आयोजक समाजका पूर्व उपाध्यक्ष राजु शर्मा, आठौँ कार्यसमितिका पदाधिकारी, सदस्य शारदा पराजुली, मुकुन्द प्रसाद प्रसाईं, भोला शर्मा, सङ्गीता अधिकारी, रिता चालिसे, मिमन पुलामी, अनिल पौडेल, रामराजा ओझा, नारायणप्रसाद आचार्यलगायतको सहभागिता रहेको थियो ।

कार्यक्रममा वरिष्ठ साहित्यकार लोहनीलाई माला, दोसल्ला र उहाँको योगदान झल्कने सम्मानपत्र समर्पण गरिएको थियोे ।

त्यसैगरी ‘त्वदीयं वस्तु गोविन्द तुभ्यमेव समर्पये’ अर्थात् ‘जसको सिर्जना हो, उहाँलाई नै सुनाउने’ खण्डको कार्यक्रममा सभाकक्षमा उपस्थित सबैले सम्मानित स्रष्टा लोहनीद्वारा विभिन्न कालखण्डमा रचिएका कथा, कविता, मुक्तक, हाइकु, चोका, कटौता आदिका रचना उहाँलाई नै सुनाएका थिए ।

सो अवसरमा मन्तव्य राख्दै सम्मानित व्यक्तित्व लोहनीले ८८ वर्षको उमेरमा पनि आफूमा साहित्य सिक्ने र सिकाउने ऊर्जा अझै कायम रहेको विचार प्रकट गर्दै सत्यको पक्षमा आफूले निडरतापूर्वक कलम चलाएको तर प्राप्तिको लागि भनेर नलेखेको धारणा राख्नुभयो ।

समारोहमा कार्यक्रम आयोजनाको औचित्य पुष्टि गर्दै आयोजक समाजका अध्यक्ष आचार्यले मन्तव्य राख्नुभएको थियो ।

कार्यक्रममा विशेष अतिथि प्रसाईं, समाजका पूर्व अध्यक्ष एवम् अतिथि साहित्यकारद्वय विमल भौकाजी र श्रीबाबु कार्कीले रचना वाचनको पृष्ठभूमिमा विद्युतकर्मी साहित्यिक समाजको सिर्जनात्मक गतिविधि र लोहनीको साहित्यिक देनका बारेमा सङ्क्षिप्त टिप्पणी गर्नुभएको थियो ।

करिब दुई घन्टासम्म चलेको उक्त कार्यक्रमको सहजीकरण विद्युतकर्मी साहित्यिक समाजका सचिव युवराज शर्माले गर्नुभएको थियो ।

कार्यक्रमको अन्त्यमा अतिथि साहित्यकारलाई मायाको चिनो प्रदान गरिनुका साथै लोहनीकी पत्नी महालक्ष्मी लोहनीको हातबाट तयार भएको स्वादिलो खाजा वितरण गरिएको थियो ।