दाङ । लुम्बिनी वाङ्मय प्रतिष्ठान नेपालबाट १२ जिल्लामा गरिने जिल्लाव्यापी कार्यक्रमको मासिक शृङ्खला दाङ जिल्लाको भक्ति थापा स्मृतिपार्कमा २०८२ असोज २५ गते शनिबार सम्पन्न भएको छ ।
दाङका नारी स्रष्टाको पहिचान र योगदान विषयमा सन्ध्या रेग्मी र विभेदरहित संस्कृति निर्माणमा साहित्य र कलाको भूमिका विषयमा ऋषि आजादले कार्यपत्र पेस गर्दै सो कार्यक्रम सम्पन्न भएको हो ।
कार्यक्रमका प्रमुख अतिथि लुम्बिनी प्रदेशसभाका सभामुख माननीय तुलबहादुर घर्तीमगरले नारी स्रष्टाको भूमिकाको विषयमा बोल्दै विभेदरहित संस्कृति निर्माणमा लाग्न साहित्यकार र कलाकारलाई आग्रह गर्नुभयो ।
समाजमा अहिले पनि उत्पीडित वर्ग उत्पीडक वर्गबिच मनोवैज्ञानिक दरार भएको, त्यही दरारबाट समाज विभक्त बनेको तथा त्यही नै विभेदको मूल कारण हो भन्दै २०६३ सालले उत्पीडित वर्ग र समुदायलाई समानुपातिक समावेशीका आधारमा सत्तामा त ल्यायो तर विभेद हटाउने विषयमा निष्ठापूर्वक काम हुन नसकेको उहाँको भनाइ थियो ।
दाङका स्रष्टाको पहिचान कार्यपत्रमाथि बुनु लामिछानेले टिप्पणी गर्नुभएको थियो भने विभेदरहित संस्कृति निर्माणको विषयमा सबै वक्ताले आआफ्ना धारणा राख्नुभएको थियो ।
कार्यक्रममा प्रतिष्ठानका संस्थापक पुरुषोत्तम खनालले आफूहरूले मिहिनेत गरेर स्थापना गरेको संस्था निरन्तर क्रियाशील भइरहँदा खुसी लागेको बताउँदै रचनात्मक क्रियाकलापमा यो संस्थाको भूमिका महत्त्वपूर्ण रहने बताउनुभयो ।
डा. टिकाराम उदासीले नारीस्रष्टाको विषयमा एकमुष्ट विवरणसहित तथ्य प्रस्तुत गर्नुभएकोमा कार्यपत्र प्रस्तोता रेग्मी र टिप्पणीकर्ता बुनु लामिछानेलाई धन्यवाद दिंदै विभेदरहित संस्कृति निर्माणमा साहित्यकार र कलाकारले भूमिका खेल्नुपर्ने बताउनुभयो ।
उत्तमकृष्ण मजगैयाले कार्यपत्रमाथि सुधारको सुझावसहित विभेदलाई एकमुष्ट रूपमा प्रस्तुत गरिएको भन्दै विभेदरहित संस्कृति निर्माणमा साहित्य र कलाको भूमिका हुने बताउननुभयो ।
प्रतिष्ठानका उपाध्यक्ष तिलक लामिछाने र महासचिव पुरुषोत्तम पाण्डेयले रचनावाचनसँगै संस्थाका भावी योजना प्रस्तुत गर्नुभयो ।
कार्यक्रममा रामगोपाल यादव, केशरी यादव, शनिराम चौधरी, तीला पन्थी ‘सुस्मिता’, पुरन शर्मा, शारदा शर्मा, डा. कृष्णराज डिसी, चन्द्रबहादुर थापा, दीपक शर्मा समीरले कवितावाचनसँगै मन्तव्य राख्नुभएको थियो ।
सो अवसरमा केशरी यादव, शनिराम चौधरी, तीला पन्थी ‘सुस्मिता’ लाई संस्कृति संरक्षण र साहित्यमा विशेष योगदान दिएको भन्दै सम्मान गरिएको थियो ।
कार्यक्रममा अवधी संस्कृति संरक्षण प्रतिष्ठान गढवाका कलाकारले विशेष सांस्कृतिक प्रस्तुति दिएका थिए ।
प्रतिष्ठानको दाङ जिल्ला अध्यक्ष निमबहादुर थापाको अध्यक्षता, उपाध्यक्ष राधा गौतमको स्वागत र सचिव गुरुप्रसाद कुमाल ‘बुलबुल’ को सञ्चालनमा उक्त कार्यक्रम सम्पन्न भएको थियो ।
