काठमाडौं । त्रिभुवन विश्वविद्यालयले जेनजी आन्दोलनमा जलेर नष्ट भएको परिक्षा केन्द्रमा पुनः परीक्षा गर्ने निर्णय गरेको छ ।
परीक्षा नियन्त्रण कार्यालयका अनुसार तीनवटा परीक्षा केन्द्रमा ६५२ जना विद्यार्थीको उत्तरपुस्तिका जलेर नष्ट भएको हो ।
वार्षिक परीक्षा प्रणालीअन्तर्गत व्यवस्थापन संकाय, मानविकी तथा सामाजिकशास्त्र संकाय र शिक्षाशास्त्र संकायको गत भदौ २२ गते देखि सञ्चालित ४ वर्षे स्नातक तह दोस्रो वर्षको आंशिक तथा मौका परीक्षाको उत्तरपुस्तिका जलेको हो ।
२२ गते र २३ गतेका परीक्षाको उत्तरपुस्तिका सुरक्षाका दृष्टिले नजिकको प्रहरी चौकीमा राखिएको थियो । आन्दोलनमा चौकी जलाएपछि उत्तरपुस्तिका जलेका हुन् ।
त्रिवि केन्द्रीय परीक्षा सञ्चालक समितिको असोज २२ गते बसेक बैठकले परीक्षा रद्द गरी पुनः परीक्षा लिने निर्णय गरेको हो ।
सम्बन्धित परीक्षा केन्द्र तथा सो केन्द्रमा परेका क्याम्पसले आआफ्ना विद्यार्थीहरूलाई उक्त दिनहरूका परीक्षा पुनः दिनु पर्ने बल्खुले जनाएको छ ।
