काठमाडौं । राष्ट्रिय जनमोर्चाका उपाध्यक्ष एव सांसद दुर्गा पौडेलले अमेरिकी सहयोग मिलेनियम च्यालेन्ज कर्पोरेशन (एमसीसी) सम्झौता देखाउने दाँत मात्रै भएको र असली दाँत आइपीएस भएको पौडेलले बताउनुभएको छ ।
एमसीसीविरुद्ध आन्दोलनरत ११ दलीय मोर्चाले मंगलबार माइतीघर मण्डलामा आयोजना गरेको विरोध सभालाई सम्बोधन गर्दै पौडेलले भन्नुभयो, ‘आइपीएस भारत र अमेरिकाको प्रोजेक्ट हो, हाम्रो राष्ट्रियता, सार्बभौमीकता र असंलग्न परराष्ट्र नीति पैसासित साटिन्न, हामी कहिल्यै गुलाम भएनौँ र एमसीसी मार्फत पनि गुलाम हुने छैनौँ । स्वयम् प्रधानमन्त्री केपी शर्मा ओलीकै पार्टीले पनि भनेको छ, कि एमसीसी जस्ताको त्यस्तै पास गरेर जाने हो भने नेपालको ऐन, कानुन र संबिधान भन्दा माथि जान्छ । जसले राष्ट्रियता, सार्वभौमिकता माथि हस्तक्षेप हुन्छ ।’
उहाँले अगाडि थप्नुभयो, ‘जनतालाई भ्रम छर्नको लागी सरकारले एमसीसी विकास निर्माणको लागि हो भनेको छ । हामीले विकास निमार्णको विरोध गर्ने भए त जापान, चाइनालगायत देशहरुले पनि बिभिन्न विकास निर्माणका कामहरु गरेका छन् । हामीले त त्यसको विरोध गरेका छैनौं ।’
नेत्री पौडेलले यसका दफा २.८ मा कुनै पनि विदेशी कर्मचारीहरुलाई कर नलाग्ने, दफा ३.२ (च) मा एमसीसी परियोजनाको सम्पुर्ण बौद्धिक सम्पत्ति अमेरिकाको हुने, परियोजना निर्माण पछिको सक्कली डकुमेण्ट अमेरिकालाई बुझाउनु पर्ने, लेखा रिपोर्ट नेपालले गर्न नपाउने, त्यस्तै एमसीसीको प्रावधानमा अमेरिकी सुरक्षा नीति र सुरक्षा नीतिको प्रतिकुल भएमा परियोजना खारेज हुने, अमेरिकी हित विपरित भए स्वतः खारेज हुने, परियोजनाको बुँदासँग नेपालको कानुन बाँझिएमा नेपालको कानुन खारेज हुनेजस्ता प्रावधानले एमसीसी राष्ट्रहित विपरित भएको बताउनुभयो ।
नेकपा (मसाल) सहित ११ राजनीतिक दल तथा संगठनले मंगलबार देशब्यापी एमसीसी विरुद्ध प्रदर्शन अन्तर्गत काठमाडौंको माइतीघर मण्डलामा प्रदर्शन भएको हो ।
नेकपा (माले)का पीबीएम कृष्ण रानाको सञ्चालनबाट अघि बढेको विरोध सभालाई नेपाल कम्युनिष्ट पार्टीका संयोजक लोकनारायण सुवेदी, राष्ट्रिय जागरण मञ्चका प्रतिनीधि नरबहादुर कार्की, नेकपा राजनीतिक अभियानका श्रीकृष्ण महर्जन, देशभक्त जनगणतान्त्रिक मोर्चाका अध्यक्ष सिपी गजुरेल, जनसमाजवादी पार्टीका अध्यक्ष सुभाषराज काफ्ले, कोरियाका लागि पूर्व राजदुत कमान सिंह लामा, बिमल अधिकारी र नेकपा (माओवादी केन्द्र) का कर्णजीत बुढाथोकीले सम्बोधन गर्नुभएको थियो ।
