काठमाडौँ । राष्ट्रिय जनमोर्चाले भदौ २३ गतेको घटनाका लागि मुख्यतः सरकार नै जिम्मेवार भएको धारणा व्यक्त गरेको छ ।

अध्यक्ष चित्रबहादुर केसीको हस्ताक्षरमा २०८२ भदौ २४ गते प्रेसवक्तव्य जारी जारी गर्दै राजमोले सो धारणा व्यक्त गरेको हो ।

देशको वर्तमान स्थितिलाई देशीविदेशी शक्तिले उपयोग गर्न सक्नेतर्फ सतर्क बनाउँदै राजमोले सही र सन्तुलित राजनीतिक दृष्टिकोण अपनाउनुपर्ने आवश्यकतामा जोड दिइएको छ ।

वक्तव्यमा घटनाप्रति क्षोभ व्यक्त गर्दै मृतकप्रति श्रद्धाञ्जली, सन्तप्त परिवारप्रति समवेदना, घाइतेको स्वास्थ्यलाभको कामना तथा घाइतेको निःशुल्क उपचार गर्न माग गरिएको छ ।

यस्तो छ, प्रेसवक्तव्यको पूर्ण पाठ :
“२०८२ भदौ २३ गते जेनजीको आन्दोलनको दौरानमा सरकारले गरेको क्रुर दमनको कार्यप्रति हाम्रो पार्टी राष्ट्रिय जनमोर्चाले गम्भीर प्रकारको क्षोभ तथा आक्रोश प्रकट गर्दछ । सरकारद्वारा मारिएका मृतकप्रति श्रद्धाञ्जली तथा उनीहरूका सन्तप्त परिवारजनप्रति हार्दिक समवेदना प्रकट गर्दै सम्पूर्ण घाइतेप्रति शीघ्र स्वास्थ्यलाभको कामना गर्दछ । त्यसका साथै घाइतेको निःशुल्क उपचारका लागि आवश्यक सम्पूर्ण व्यवस्था मिलाउन सरकारसँग माग गर्दछ ।

राष्ट्रिय जनमोर्चाले पहिले नै यो स्पष्ट गरेको थियो कि सामाजिक सञ्जाललाई नियमन गर्नु आवश्यक छ । त्यसबारे सर्वोच्च अदालतले पनि सरकारको नाममा परमादेश जारी गरेको थियो । सर्वोच्च अदालतले त्यसबारे कानुन बनाएर नै नियमन गर्न निर्देशन दिएको थियो । सर्वोच्च अदालतको त्यो निर्देशनअनुसार नगरेर सरकारले दर्ता गर्ने सूचनालाई पालना नगरेको भन्दै एकैसाथ विभिन्न सामाजिक सञ्जालमाथि रोक लगाउने काम गरेको थियो । सरकारको त्यस प्रकारको स्वेच्छाचारी कारबाहीका कारणले नै जनतामा व्यापक आक्रोश उत्पन्न भयो ।

त्यसबाट हिजोको दुखदायी घटना घट्न पुग्यो । त्यसका लागि मुख्य रूपले सरकार नै जिम्मेवार छ ।

हिजोको प्रदर्शनलाई दबाउनका लागि सरकारले अनावश्यक बलप्रयोग गरेको देखिन्छ । त्यसैको परिणाम १९ जनाको मृत्यु भएको छ भने ४०० भन्दा बढी व्यक्ति घाइते भएका छन् । उनीहरूमध्ये कैयौँ जना गम्भीर रूपमा घाइते छन् । यति ठुलो दमनको लागि राष्ट्रिय जनमोर्चाले कडा शब्दमा सरकारको विरोध र भर्त्सना गर्दछ ।

हिजोको घटना सामान्य नभई त्यो अत्यन्त गम्भीर प्रकारको रहेको छ । त्यो एउटा राष्ट्रिय प्रश्न बनेको छ । त्यसकारण त्यसबारे हामीले अन्य पक्षसित पनि छलफल गरेर एउटा साझा समझदारी बनाउन प्रयत्न गर्नेछौँ । विभिन्न देशी वा विदेशी प्रतिक्रियावादी शक्तिले यो स्थितिलाई आफ्ना निहित स्वार्थका लागि प्रयोग गर्ने प्रयत्न पनि गर्न सक्दछन् । त्यसप्रति पनि हाम्रो गम्भीर ध्यान जानुपर्ने आवश्यकता छ ।

अन्तमा, अहिले देशमा जुन प्रकारको राजनीतिक स्थिति उत्पन्न भएको छ, त्यसबारे सही र सन्तुलित प्रकारको नीति अपनाउन नसकेमा त्यसका दूरगामी गम्भीर प्रकारका दुष्परिणाम हुने सम्भावनालाई अस्वीकार गर्न सकिन्न ।”