प्रकाश थापा मगर/काठमाडौँ

नेकपा (मसाल) का प्रवक्ता रामप्रकाश पुरीले मिलेनियम च्यालेन्ज कर्पोरेसन (एमसिसी) सित अमेरिकाको सामरिक स्वार्थ जोडिएकाले विरोध गरिएको बताउनुभएको छ । दशदलीय मोर्चाको आयोजनामा आज २०७७ असार २ गते माइतिघर मण्डलामा आयोजित विरोधसभामा मन्तव्य राख्दै उहाँले यस्तो अभिव्यक्ति दिनुभएको हो ।

‘एमसिसीमा आर्थिक परियोजना पनि हो भन्ने जान्दाजान्दै पनि हामीले त्यसको किन विरोध गरेका छौँ ?’ प्रवक्ता पुरीले भन्नुभयो– ‘एमसिसीको नाममा अमेरिकी साम्राज्यवादको रणनीतिक स्वार्थ बढ्ने भएपछि हामीले त्यसको विरोध गरेका हौँ ।’ उहाँले एकातिर, त्यो देशको राष्ट्रिय सार्वभौमिकताको र अर्कातिर, हाम्रो स्वतन्त्र असंलग्न परराष्ट्र नीतिको विरुद्धमा हुने भएकाले नेकपा (मसाल) ले एमसिसीको विरोध गरेको बताउनुभयो । उहाँले हिन्दप्रसान्त रणनीति (आइपिएस) अमेरिकीको सामरिक योजना भएकाले त्यसअन्तर्गतको एमसिसी विशुद्ध आर्थिक परियोजना नभएको पनि बताउनुभयो ।

नेपालको इतिहासमा देशमा राष्ट्रघाती सन्धिसम्झौता हुँदा प्रतिपक्षी दलको खबरदारी हुने गरेको प्रसङ्गमा प्रवक्ता पुरीले भन्नुभयो– ‘हाम्रा लागि दुःखको कुरा हो, प्रमुख प्रतिपक्षी दल नेपाली काङ्ग्रेस नै जसरी भए पनि एमसिसी पारित गर्ने प्रयासमा छ ।’ उहाँले नेपाली काङ्ग्रेसकै कारण पनि नेपालमा एमसिसी पारित गरिन थाल्नु चिन्ताको विषय बताउनुभयो ।

एमसिसी पारित नभए विश्व समुदायसामु नेपालको विश्वसनीयता गुम्ने वर्तमान सरकारको अभिव्यक्तिको विरोध गर्दै उहाँले भन्नुभयो– ‘एमसिसी फेल भएर नेपालका विश्वसनीयता विश्वसामु गुम्छ भने गुमोस् । तर देशको राष्ट्रिय सार्वभौमिकता र असंलग्न परराष्ट्र नीतिका सामु यस्तो विश्वसनीयता केही पनि होइन ।’ उहाँले देशका शासकलाई विदेशसित सन्धिसम्झौता गर्दा देशको राष्ट्रिय सार्वभौमिकता, स्वाधीनता, स्वाभिमान र असंलग्न परराष्ट्र नीतिप्रति अडिग रहन आग्रह गर्नुभयो ।

कार्यक्रममा मन्तव्य राख्दै राष्ट्रिय जनमोर्चाका केन्द्रीय सचिव हिमलाल पुरीले एमसिसी नेपालको राष्ट्रिय हित, स्वाधीनता, आर्थिक हित, असंलग्न परराष्ट्र नीति सबैको प्रतिकूल भएको बताउँदै यस विषयलाई गम्भीरतापूर्वक लिनुपर्ने बताउनुभयो । एमसिसी पारित गरिएमा त्यसले नेपालको आन्तरिक र परराष्ट्र सम्बन्धमा दूरगामी प्रभाव पर्ने बताउँदै उहाँले अमेरिकी सामरिक स्वार्थसँग जोडिनु हाम्रा लागि खतरनाक हुने चेतावनी पनि दिनुभयो । उहाँले एमसिसी तत्कालै खारेज गर्न आग्रह गर्नुभयो ।

देशभक्त जनगणतान्त्रिक मोर्चाका महासचिव परि थापाले एमसिसी हजार वर्षको योजना भएको बताउँदै नेपालमा एमसिए मार्फत् उक्त योजना पाँच वर्षभित्र सकिने भनिए पनि त्यसको सक्रियता हजार वर्षसम्म रहिरहने बताउनुभयो । नेकपा (क्रान्तिकारी–माओवादी) का पिबिएम दिनेश शर्माले बङ्गलादेशलाई विद्युत विक्री गरिने नाममा गोरखपुरतिर प्रसारण लाइन बन्नुले नै एमसिसीमा राष्ट्रघातको गन्ध आएको बताउनुभयो ।

कार्यक्रममा नेकपा (माले) का पिबिएम सुरेन्द्र ढकाल, जनसमाजवादी पार्टीका उपमहासचिव डम्मर कार्की, नेकपा (माओवादी–केन्द्र) का पिबिएम तिलक थापा मगर, नेकपाका केन्द्रीय उपाध्यक्ष लोकनारायण सुवेदी, नेकपा (संयुक्त) का नारायण थापा र राष्ट्रिय जनजागरण परिषद्का सुधीर कर्माचार्यले पनि सम्बोधन गर्नुभएको थियो ।

त्यसैगरी, कार्यक्रमप्रति ऐक्यबद्धता प्रकट गर्दै एमसिसी खारेज अभियानका आरसी न्यौपाने, नेपाल सर्वहारा कम्युनिस्ट पार्टी (माओवादी) का भावना विद्रोही, हाम्रो पार्टी नेपालमा ब्रह्माण्ड, पुष्पलाल अध्ययन समाज काठमाडौँका बोर्णबहादुर कार्की र युवाविद्यार्थी अभियानका घाइते निरज नवीनले पनि मन्तव्य राख्नुभएको थियो ।

एमसिसी विरुद्धको उक्त कार्यक्रममा नेपाल राष्ट्रियता तथा जनअभियान संरक्षण मञ्च र एमसिसी खारेज युवाविद्यार्थी अभियानले पनि एक्यबद्धता प्रकट गरेका थिए ।

कार्यक्रमको आयोजना नेकपा (मसाल), नेकपा (क्रान्तिकारी–माओवादी), नेकपा (माले), राष्ट्रिय जनमोर्चा, देशभक्त जनगणतान्त्रिक मोर्चा, नेपाल कम्युनिस्ट पार्टी, नेकपा (माओवादी–केन्द्र), जनसमाजवादी पार्टी, राष्ट्रिय जनगागरण परिषद् र नेकपा (संयुक्त) ले गरेका थिए ।