गोपालप्रसाद भट्टराई, सन्धिखर्क ।
अखिल नेपाल महिला सङ्घकी महासचिव सकुन्तला रानाले महिला अधिकारीकर्मीमाझ एकता हुन नसक्दा हिंसामा परेका महिलाले न्याय पाउन नसकेको आरोप लगाउनुभएको छ ।
महिला सङ्घ अर्घाखाँचीले २०८२ भदौ २ गते सोमबार सन्धिखर्कमा आयोजना गरेको तिजसम्बन्धी कार्यक्रमलाई सम्बोधन गर्दै महासचिव रानाले यस्तो बताउनुभएको हो ।
संविधानमा उल्लेख भएका अधिकार र पीडकलाई दिने दण्डको कार्यान्वयनमा सरकार चुकिराखेको र अधिकारकर्मीद्वारा राज्यलाई दबाब नपुगेको उहाँको भनाइ छ ।
निर्मला पन्तको बलात्कारपछि हत्या भएको सात वर्ष पुगिसक्दा पनि न्याय नपाउनु बिडम्बना भएको उहाँको तर्क थियो ।
महिलालाई दोस्रो दर्जाको व्यवहार गर्ने पितृसत्तात्मक यो देशका शासकमा अझै पनि चेत नखुलेको भन्दै महासचिव रानाले महिला अधिकार र मुक्तिको निम्ति महिला एकताको खाँचो औल्याउनुभएको छ ।
नेपालका हरेक पर्वलाई विकास र सचेतनासँग जोडेर मनाउनुपर्नेमा उहाँको जोड रहेको छ ।
राष्ट्रिय जनमोर्चाका जिल्ला अध्यक्ष थम्मन केसी र अखिल नेपाल युवक सङ्घका अर्घाखाँचीका सचिवालय सदस्य ऋता बन्जाडेले नेपालमा पर्व मनाउने नाममा हुने तडकभडक रोक्नुपर्ने र समाजको एकता र सद्भावलाई बढानुपर्नेमा जोड दिनुभएको छ ।
कार्यक्रममा राजमो केन्द्रीय सदस्य तथा भूमिकास्थान नगरप्रमुख झबिलाल थापा, राजमो केन्द्रीय सदस्य यमलाल पोख्रेल, राजमो नेता शेरबहादुर बिसी, राजमो जिल्ला सचिव तथा भूमिकास्थान–४ का वडाध्यक्ष बाबुराम पन्थी, नेकपा (मसाल) का अर्घाखाँचीका प्रवक्ता पशुपति ढकाल, राजमो जिल्ला उपाध्यक्ष गोपाल पौडेल, जिल्ला कोषाध्यक्ष गोविन्द बिसी, राजमो नेता दिलदार हुसेनलगायतको आतिथ्य रहेको थियो ।
कल्पना पोख्रेलको अध्यक्षता, लीला भुसालको स्वागत मन्तव्य र मीना बिसीको सञ्चालनमा सम्पन्न कार्यक्रममा महिला सङ्घमा आबद्ध महिलाले प्रगतिशील तिजगीत गाएर नाँच्दै रमाइलो गरेका थिए ।
