काठमाडौँ । कैलाली कारागारभित्र हिंसात्मक झडपप्रति राष्ट्रिय जनमोर्चा सुदूरपश्चिम प्रदेश समितिका अध्यक्ष नन्दराज भट्टले गम्भीर ध्यानाकर्षण भएको जनाउनु भएको छ ।
२०८२ श्रावण २४ गते एक वक्तव्य जारी गरी भट्टले हिंसात्मक झडपलाई सरकारले घटनालाई गम्भीरतापूर्वक लिई कारागार प्रशासन, गृह मन्त्रालय तथा गृह मन्त्रालय सम्बद्ध निकायले सतर्कता नअपनाएकोप्रति राष्ट्रिय जनमोर्चा सुदूरपश्चिमले दुःख व्यक्त गरेको छ ।
कारागार जस्तो संवेदनशील तथा सरकारको प्रत्यक्ष पहुँच तथा नियन्त्रण भएको निकायमा समेत आपराधिक गिरोह सङ्गठित भएर आपराधिक क्रियाकलाप सञ्चालन गर्न एक प्रकारले छुट दिनु र त्यसलाई कडाइपूर्वक रोक्न सरकारले कुनै ध्यान दिन नसक्नुको परिणाम हिंसात्मक घटना घटेको राष्ट्रिय जनमोर्चाको ठहर छ ।
त्यस्तै उक्त घटनाको आवश्यक छानबिन गर्न न्यायिक समिति गठन गरिनु पर्नेमा राष्ट्रिय जनमोर्चाले जोड एिको छ । साथै घटनामा मृत्यु भएका कैदी बन्दीको परिवारलाई आवश्यक क्षतिपूर्तिको समेत माग गरेको छ ।
वक्तव्यमा लेखिएको छ :
‘कैलाली कारागारभित्र २०८२ श्रावण २३ गते कैदी बन्दीका बिच भएको हिंसात्मक झडपप्रति राष्ट्रिय जनमोर्चा सुदूरपश्चिम प्रदेश समितिको गम्भीर ध्यानाकर्षण भएको छ ।
१. कैलाली कारागारभित्र कैदी बन्दीहरूका बिच योभन्दा अगाडि पनि हिंसात्मक वारदातहरू हुने गरेका थिए । कैदी बन्दीहरूका बिच परस्पर विरोधी गुटहरूले पनि कारागारभित्रबाट सङ्गठित ढङ्गबाट आपराधिक गतिविधिका प्रत्यक्ष तथा अप्रत्यक्ष रूपमा सञ्चालन गरिरहेको समाचार पटक पटक सार्वजनिक हुने गरेका थिए ।
२. कैलाली कारागारभित्र परस्पर विरोधी गिरोहका बिच विगतमा हुने गरेका हिंसात्मक झडपलाई सरकारले घटनालाई गम्भीरतापूर्वक लिई कारागार प्रशासन, गृह मन्त्रालय तथा गृह मन्त्रालय सम्बद्ध निकायले सतर्कता नअपनाएका कारण यस्तो प्रकारको हिंसात्मक झडपको घटना घट्न गएको स्पष्ट नै छ । उक्त हिंसात्मक घटनामा एकजना कैदी बन्दीको मृत्यु भएको छ भने चार दर्जनभन्दा बढी घाइते भएका छन् । उक्त घटनाप्रति राष्ट्रिय जनमोर्चा सुदूरपश्चिमले दुःख व्यक्त गर्दछ ।
३. कारागार जस्तो संवेदनशील तथा सरकारको प्रत्यक्ष पहुँच तथा नियन्त्रण भएको निकायमा समेत आपराधिक गिरोह सङ्गठित भएर आपराधिक क्रियाकलाप सञ्चालन गर्न एक प्रकारले छुट दिनु र त्यसलाई कडाइपूर्वक रोक्न सरकारले कुनै ध्यान दिन नसक्नुको परिणाम हिजो घटेको हिंसात्मक घटना हो ।
४. सरकारको सुरक्षा घेराभित्र अपराधीहरूलाई सुधार गर्न खडा गरिएको निकाय वा सुधार गृहभित्र भएको यस्तो आपराधिक तथा हिंसात्मक घटना कसरी घट्न गयो ? हिंसात्मक घटना घट्दा त्यसलाई नियन्त्रणमा लिन सुरक्षा सम्बद्ध निकायले किन लापरबाही देखायो ? त्यसबारे आवश्यक छानबिन गर्न न्यायिक समिति गठन गरिनुपर्दछ । त्यसका साथै घटनामा मृत्यु भएका कैदी बन्दीको परिवारलाई आवश्यक क्षतिपूर्ति दिइनुपर्दछ ।’
मिति : २०८२ श्रावण २४
नन्दराज भट्ट
अध्यक्ष
राष्ट्रिय जनमोर्चा
सुदूरपश्चिम प्रदेश, प्रदेश समिति
