टोकियो । बितेको दुई साताको अवधिमा दक्षिणी जापानमा पातलो बस्ती भएको टापुसमूहमा ९०० भन्दा धेरै भूकम्प आएपछि मानिस अत्तालिएका छन् ।

जुन २१, २०२५ देखि टोकारा टापु वरपरको समुद्रमा भूकम्पीय गतिविधि निकै सक्रिय रहेको अधिकारीले बताएका छन् । त्यहाँ जुलाई २ बुधबारका दिन पनि ५।५ म्याग्निट्यूडको भूकम्प आएको थियो ।

अहिलेसम्म क्षतिका विवरण आएको छैन र सुनामीको चेतावनी पनि जारी गरिएको छैन तर प्रशासनले त्यहाँबाट अन्यत्र जानको निम्ति स्थानीय बासिन्दालाई तयार रहन भनेको छ ।

जहिल्यै हल्लिरहन्छ
एक जना स्थानीय बासिन्दाले क्षेत्रीय प्रसारक एमबिसीसँग कुरा गर्दै सुत्न पनि डर लागेको बताएका छन् । उनले भने– ‘जहिल्यै हल्लिरहेकोजस्तो अनुभव भएको छ ।’

टोकारा क्षेत्रले विगतमा पनि यस्ता भूकम्प बेहोरेको छ तर लगातार एकपछि अर्को गरी आएका पछिल्ला भूकम्प अलि अस्वाभाविक लागेको स्थानीय सञ्चारमाध्यमको बुझाइ छ ।

भूकम्पको दृष्टिले जापान संसारमै सबभन्दा सक्रिय देशमध्ये पर्छ । प्यासिफिक रिङ अफ फायर भनिने कैयन् टेक्टोनिक प्लेटको सङ्गम रहेको स्थलमा जापान अवस्थित छ । त्यहाँ हरेक वर्ष करिब डेढ हजार भूकम्प जाने बताइन्छ ।

टोकाराको १२ मध्ये सात टापुमा करिब सात सय मानिस बस्छन् । कतिपय विकट टापुमा अस्पताल छैनन् । सबैभन्दा नजिकको टापु भनेको उक्त प्रिफेक्चरको राजधानी कागोसिमाबाट डुङ्गामा कम्तीमा छ घण्टा पर छ ।

‘भूकम्प आउनुअगाडि समुद्रबाट अनौठो गर्जनजस्तो आवाज आउँछ । खासगरी रातको समयमा । निकै डरमर्दो छ’ आकुसेक्जीमा टापुकी चिजुको आरिकावाले द असाही सिम्बुनसँग भनिन् ।

‘सबै जना थकित छन् । हामी सबै जना यो रोकियोस् भन्ने चाहन्छौँ’ समुद्र तटमा आफ्ना पतिसँग बस्ने यी ५४ वर्षीया महिलाले भनिन् ।

‘यति धेरै भूकम्पपश्चात् अब त केही नहुँदा पनि जमिन हल्लिरहेको जस्तो लाग्छ’ आकुसेक्जीमा टापुका स्थानीय बासिन्दाको सङ्घका अगुवा ६० वर्षीय इसामु साकामोतोले भने ।

‘मुनिबाट धक्का आएजस्तो भएर कम्पन सुरु हुन्छ अनि घर हल्लन्छन् । त्रासपूर्ण छ’ उनको भनाइ थियो ।

टोकारा टापुका केही गेस्टहाउसले भूकम्पका कारण पर्यटकलाई आउनबाट रोकेको र तिनलाई आवश्यक परे स्थानीयका लागि आश्रयको रूपमा प्रयोग गरिने वेबसाइटमा उल्लेख छ ।

जापानमा आउने अधिकांश भूकम्प साना हुन्छन् तर केही विनाशकारी हुन्छन् । सन् २०११ को भूकम्पले उत्तरपूर्वी तटमा ठुलो सुनामी ल्यायो, जसका कारण १८ हजारभन्दा धेरै मानिसको ज्यान गयो ।

दशकौँदेखि अधिकारीले अर्को ठुलो भूकम्प, जुन शताब्दीमा एकपटक आउँछ, आउला भन्ने डर पालेका छन् । धेरै मानिस यो डरमाझ नै हुर्किएका छन् । एकदमै खराब अवस्थामा तीन लाख मानिसको ज्यान जाने प्रक्षेपण गरिएको छ । (बिबिसी)