काठमाडौँ । अमेरिकाले आफ्नो परमाणु केन्द्रलाई ध्वस्त पार्ने गरी आक्रमण गरेको दाबी गरे पनि इरानका सर्वोच्च नेता आयतोल्लाह अली खामेनेईले अमेरिकालाई कुनै फाइदा नभएको बताएका छन् ।
जुन २४, २०२५ का दिन इजरायलसँग युद्धविराम सहमति भएपछि पहिलो सार्वजनिक सम्बोधन गर्दै इरानी नेताका खामेनेईले सो दाबी गर्नुभएको हो ।
उहाँले अमेरिकी आक्रमणले इरानको परमाणु कार्यक्रम बिथोल्नेतर्फ कुनै ठुलो उपलब्धि हासिल नभएको बताए बरु आफ्नो देशले कतारस्थित अमेरिकी हवाई सैन्य अखडामा गरेको जबाफी आक्रमणले गम्भीर धक्का पुऱ्याएको उनले दाबी गरे ।
यसअघि, राष्ट्रपति डोनल्ड ट्रम्पले अमेरिकी आक्रमणले इरानका तीन महत्त्वपूर्ण परमाणु केन्द्रहरू पूर्ण सखाप भएको बताएका थिए ।
पेन्टागनको खुफिया निकायले गरेको प्रारम्भिक विश्लेषणमा इरानी परमाणु क्षमतामा खासै हानि नभएको भनेर अमेरिकी सञ्चारमाध्यममा हालै चुहाइएको विवरणलाई ट्रम्पले अस्वीकार गर्दै आक्रोश प्रकट गरेका थिए ।
फोर्दोको भूमिगत केन्द्रमा अमेरिकाले शक्तिशाली बङ्कर बस्टर बम खसालेको थियो ।
इरान के भन्छ ?
जुन १३ मा इजरेलसँग प्रत्यक्ष लडाइँ सुरु भएदेखि सार्वजनिक रूपमा ओझेल परेका खामेनेइले जुन २६ बिहीबारका दिन टेलिभिजन सम्बोधन गर्दै एक साता लामो उनको मौनता तोडेका थिए ।
उनी सीमित सञ्चार सम्पर्कका साथ कुनै बङ्करमा बसिरहेको ठानिएको छ । उनले कहाँबाट सम्बोधन गरे भन्ने पनि इरानी अधिकारीले खुलाएका छैनन् ।
बिहीबारको सम्बोधनमा खामेनेईले इरानमा फेरि आक्रमण भए मध्यपूर्वका अमेरिका अखडामा थप आक्रमण गर्ने धम्की दिए ।
ट्रम्पले इरानको परमाणु केन्द्रमा भएको आक्रमणको क्षतिलाई बढाइचढाइ गरेको उनले दाबी गरे ।
‘तिनले केही हासिल गरेनन् अनि कुनै उद्देश्य पूर्ति भएनन्’ कतारस्थित अमेरिकी अखडामा इरानले गरेको आक्रमणलाई इङ्गित गर्दै उनले भने– ‘यो घटना भविष्यमा दोहोरिन सक्छ । यदि (इरानमाथि) कुनै आक्रमण गरिए दुस्मनका निम्ति मूल्य चर्को हुनेछ ।’
सिबिसी न्युजका अनुसार इरानलाई फेरि वार्ताको टेबलमा फर्काउन ह्वाइट हाउसले कैयन् विकल्पबारे सोचविचार गरिरहेको छ, जसमा इरानको गैरसैनिक परमाणु कार्यक्रमलाई लगानी जुटाउन सहयोग गर्ने उपाय पनि रहेको छ तर इरानका विदेशमन्त्रीले बिहीबार इरानी टेलिभिजनसँग बोल्दै अमेरिकासँग वार्ताको कुनै योजना नभएको बताए ।
इरानले आफ्नो परमाणु कार्यक्रम गैरसैनिक प्रकृतिको भएको र परमाणु अस्त्र बनाउने योजना नभएको भन्दै आएको छ । (बिबिसी)
