सिक्का (इन्डोनेसिया) । इन्डोनेसियाको पूर्वमा ज्वालामुखी विस्फोट भएपछि रिसोर्ट टापु बाली जाने र आउने दर्जनौँ उडान बुधबारका लागि रद्द गरिएको अधिकारीले बताएका छन् ।
पर्यटकीय टापु फ्लोर्समा रहेको एक हजार पाँच सय ८४ मिटर (पाँच हजार एक सय ९७ फिट) अग्लो ज्वालामुखी माउन्ट लेवोटोबी लाकीलाकीमा मङ्गलबार विस्फोट भएपछि अधिकारीले यसको सतर्कतास्थिति चारस्तरीय प्रणालीको उच्चतम स्तरमा बढाएका छन् ।
“पूर्वी नुसा तेङ्गारामा लेवाटोबी लाकीलाकीको ज्वालामुखी गतिविधिका कारण आई गुस्ती नगुराह राय विमानस्थलमा धेरै उडान रद्द गरिएको छ” विमानस्थल अपरेटर अङ्कासा पुरा इन्डोनेसियाले एक विज्ञप्तिमा बताएको छ ।
रद्द गरिएका उडानमा अस्ट्रेलियाका सहरमा जेटस्टार र भर्जिन अस्ट्रेलिया सेवा समावेश छन् । त्यस्तै एयर इन्डिया, एयर न्युजिल्यान्ड, सिङ्गापुरको टाइगर एयर र चीनको जुनेयाओ एयरलाइन्सले पनि ज्वालामुखीका कारण उडान रद्द गरेको बालीको अन्तर्राष्ट्रिय विमानस्थलको वेबसाइटले जनाएको छ ।
जेटस्टारले बुधबार आफ्नो वेबसाइटमा एक विज्ञप्तिमा बाली जाने र आउने उडान रद्द भएको पुष्टि गरेको छ ।
“पूर्वानुमानले आज रातिसम्म खरानीको बादल सफा हुने अपेक्षा गरिएको छ । नतिजाका रूपमा आज दिउँसोका उडान आज साँझपछि सञ्चालन गर्न ढिलाइ हुनेछ” जेटस्टारले भन्यो ।
फ्लोर्समा लोकप्रिय पर्यटकीय हटस्पट लाबुआन बाजोका लागि प्रस्थान गर्ने धेरै घरेलु एयर एसिया उडान पनि रद्द गरिएका छन् ।
बालीको नगुराह राई विमानस्थलले आन्तरिक र अन्तर्राष्ट्रिय मार्गमा टापुभित्र र बाहिरका ३२ ओटा उडान रद्द गरिएको बताएको छ ।
विमानस्थलका एक ग्राहक सेवा एजेन्टका अनुसार उडान रद्द भए पनि उड्डयन हब अझै पनि सामान्य रूपमा सञ्चालन भइरहेको छ ।
‘यो मार्ग र एयरलाइन्समा पनि निर्भर गर्दछ’ नाम उल्लेख गर्न नमान्ने ती एजेन्टले भने ।
फ्लोरेस टापुको माउमेरे नजिकैको अपेक्षाकृत सानो विमानस्थल फ्रान्सिस्कस जाभेरियस सेडा विमानस्थल बिहीबार बिहानसम्म बन्द गरिएको अधिकारीले सामाजिक सञ्जालमा बताएका छन् । (रासस/एएफपी)
