खलङ्गा । प्युठानको स्वर्गद्वारी–४ बाँजिपुरमा अखिल (छैठौं) को ‘देश कि विदेश’ अभियान ४७ सदस्यीय एकाइ समिति गठन गर्दै सम्पन्न भएको छ ।
बाँजिपुरको गङ्गेश्वरी माध्यमिक विद्यालयमा २०८२ असार ३ गते मङ्गलबार सम्पन्न कार्यक्रममा सो समिति गठन भएको हो ।
कार्यक्रममा अखिल नेपाल युवक सङ्घ स्वर्गद्वारी नगर समितिका पूर्व अध्यक्ष मनोज पुनमगरको विशेष उपस्थिति रहेको थियो ।
सो अवसरमा मन्तव्य राख्दै उहाँले युवाहरूको वर्तमान अवस्था, विदेश पलायनको पछाडि लुकेका चुनौती र देशमै सिर्जनशील विकल्पबारे आफ्ना विचार प्रस्तुत गर्नुभएको थियो
कार्यक्रमकै अवसरमा आरुसी सुनार अध्यक्ष रहनुभएको ४७ सदस्यीय एकाइ समिति गठन गरिएको छ ।
समितिको उपाध्यक्ष अक्षे नेपाली, सचिवमा तनु नेपाली, सहसचिवमा रीता नेपाली र कोषाध्यक्ष सरला खड्का रहनुभएको छ ।
समितिले आगामी दिनमा विद्यालयस्तरीय शैक्षिक, सामाजिक तथा सङ्गठनात्मक गतिविधि सञ्चालन गर्दै विद्यार्थीलाई सशक्त र जागरुक बनाउने प्रतिबद्धता व्यक्त गरेको छ ।
अखिल (छैठौं) प्युठानका अध्यक्ष बसन्तराज गोराथोकीको नेतृत्वमा सञ्चालित विद्यार्थी जागरण अभियान हालसम्म प्युठान जिल्लाका विभिन्न विद्यालयमा विस्तार भइसकेको छ ।
विद्यार्थीमा वैदेशिक मोहको सट्टा स्वदेशमै अवसर खोज्ने सोचको विकास गर्न लक्षित गर्न चलाइएको सो अभियानमा शिक्षाप्रति सरोकार राख्ने विद्यार्थी, शिक्षक र स्थानीय बौद्धिक वर्गलाई गहिरो सन्देश दिएको बताइएको छ ।
