खलङ्गा । अखिल (छैठौँ) प्युठानद्वारा सञ्चालित ‘देश कि विदेश’ विद्यार्थी जागरण अभियानअन्तर्गत दोस्रो दिनको कार्यक्रम स्वर्गद्वारी–७ तापास्थित बेलबास माध्यमिक विद्यालयमा सम्पन्न भएको छ ।
जिल्ला अध्यक्ष बसन्त राज गोराथोकीको प्रमुख आतिथ्यमा २०८२ असार २ गते सोमबार सो कार्यक्रम सम्पन्न भएको हो ।
अभियानको नेतृत्व गर्दै आएका गोराथोकीले यो अभियानलाई गाउँगाउँको विद्यालयमा विद्यार्थीको सोच बदल्ने क्रान्तिकारी प्रक्रियाको रूपमा परिभाषित गर्नुभयो ।
उहाँले भन्नुभयो– ‘विद्यार्थी जागरण अभियान केवल सङ्गठन विस्तार मात्र होइन, यो सोच विस्तारको अभियान हो, जसले आजको विद्यार्थीलाई भोलिको नेतृत्वमा रूपान्तरण गर्छ ।’
अभियानको क्रममा अखिल (छैठौं) को ३९ सदस्यीय एकाइ समिति गठन भएको छ ।
समितिको अध्यक्षमा लक्ष्मी केसी, उपाध्यक्षमा अस्मित विक, सचिवमा निशान्त शर्मा, सहसचिवमा सन्ध्या परियार र कोषाध्यक्षमा अस्मिता गौतम रहनुभएको छ ।
कार्यक्रममा स्थानीय शिक्षक, विद्यार्थी, र अभिभावकको उत्साहजनक सहभागिता थियो ।
