लस एन्जलस । कडा अध्यागमन रणनीतिका विरुद्ध अमेरिकाभर विरोध प्रदर्शन फैलिँदै गएको छ । यस क्रममा लस एन्जलसमा दैनिक प्रदर्शनमा तीव्रता आएको हो ।
क्यालिफोर्नियाले बिहीबार राष्ट्रपति डोनाल्ड ट्रम्पको सेना तैनाथीका विरुद्ध कानुनी लडाइँको तयारी गरिरहेको छ ।
अमेरिकाको दोस्रो ठुलो सहर लस एन्जलसमा बुधबार छैटौँ दिनको विरोध प्रदर्शनका लागि एक हजारभन्दा बढी मानिस भेला भएका थिए । उनीहरू सडकमा मार्च गर्दा भिड शान्तिपूर्ण थियो ।
सहरका नेताहरूले पाँच सय वर्गमाइल (एक हजार तीन सय वर्गकिलोमिटर) महानगरका केही सहर ब्लकलाई क्षति पुऱ्याउन अँध्यारो तोडफोड र लुटपाटलाई नियन्त्रण गर्ने प्रयास गर्दा दोस्रो रातको कर्फ्यु लगाइएको थियो ।
‘म भन्न सक्छु कि अधिकांश भागमा यहाँ ग्राउन्ड जिरोमा सबै कुरा ठिकै छ’ ६६ वर्षीय सेवानिवृत्त स्कुलशिक्षक एवम् प्रदर्शनकारी लिन स्टर्गिसले भन्नुभयो– ‘हाम्रो सहरमा आगो लागेको छैन । यो जलिरहेको छैन । जसरीे हाम्रो भयानक नेताले तपाईंलाई भन्न खोजिरहेका छन् ।’
देशमा अवैध रूपमा आप्रवासीलाई समात्ने प्रयासमा अचानक वृद्धि भएपछि प्रायः शान्तिपूर्ण विरोध प्रदर्शन भड्किएका थिए ।
सेल्फ ड्राइभिङ ट्याक्सी जलाउने र प्रहरीमाथि ढुङ्गा फ्याँक्नेलगायतका हिंसाका घटना लस एन्जलस प्रहरी विभागका आठ हजार पाँच सय अधिकारीले पहिले सामना नगरेको केही पनि थिएन ।
वासिङ्टनको स्पोकेनमा प्रहरीले ३० जनाभन्दा बढी प्रदर्शनकारीलाई पक्राउ गरेपछि र भिडलाई तितरबितर गर्न मरिचका गोली प्रहार गरेपछि रातिको कर्फ्यु घोषणा गरिएको प्रहरी प्रमुख केभिन हलले पत्रकार सम्मेलनमा बताउनुभयो ।
कागजातविहीन आप्रवासीको आक्रमण भएको दाबी गर्नेसँग लड्ने बाचा गरेर ट्रम्पले गत वर्ष आंशिक रूपमा चुनाव जित्नुभएको थियो ।
गभर्नर गेभिन न्युसमको आपत्तिका बाबजुद क्यालिफोर्निया नेसनल गार्डलाई तैनाथ गर्न आदेश दिँदै ट्रम्पले अब राजनीतिक पुँजी बनाउने अवसर कब्जा गरेको बताइएको छ । दशकौँमा पहिलोपटक अमेरिकी राष्ट्रपतिले लिएको पहिलो यस्तो कदम हो ।
‘हामीसँग सुरक्षित देश हुनेछ’ उहाँले वासिङ्टनमा लेस मिजरेबल्सको प्रदर्शनमा जाँदै गर्दा पत्रकारलाई भन्नुभयो– ‘लस एन्जलसमा के हुने थियो, त्यो हुन दिने छैनौँ । याद गर्नुहोस् यदि म त्यहाँ नभएको भए… लस एन्जलस जमिनमा जलिरहेको हुने थियो ।’
ट्रम्पले तैनाथ गरेका चार हजार सात सय सैनिकमध्ये करिब एक हजार जना सक्रिय रूपमा सुविधाको सुरक्षा गरिरहेको र आइसिई एजेन्टसँग मिलेर काम गरिरहेको अपरेसनको नेतृत्व गरिरहेका आर्मी नर्थका डिप्टी कमान्डिङ जनरल स्कट सेरम्यानले बताउनुभयो ।
बाँकी सात सय सक्रिय ड्युटी मरिनसहित भेला भएका वा नागरिक अशान्तिको सामना गर्न भेला भइरहेको वा प्रशिक्षण लिइरहेको उहाँले जानकारी दिनुभयो ।
पेन्टागनले यो तैनाथीले करदातालाई १३ करोड ४० लाख डलर खर्च हुने बताएको छ ।
सन् २०२८ को राष्ट्रपतीय चुनावका लागि व्यापक रूपमा हेरिएका डेमोक्रेट गभर्नर न्युसमले ट्रम्पमाथि राजनीतिक लाभका लागि द्वन्द्व बढाउन खोजिरहेको आरोप लगाउनुभएको छ ।
‘लोकतन्त्र हाम्रो आँखामुनि आक्रमणमा परेको छ’ भन्दै उहाँले मङ्गलबार आफ्नो राज्यको सीमाभन्दा बाहिर अभूतपूर्व सैन्यीकरण सर्ने चेतावनी दिनुभयो ।
क्यालिफोर्नियाका वकिलहरू बिहीबार अदालतमा सैनिकलाई अध्यागमन अधिकारीसँग आप्रवासीलाई गिरफ्तार गर्दा साथ दिनबाट रोक्न आदेश माग्ने अपेक्षा गरिएको थियो ।
ट्रम्प प्रशासनका वकिलले यो आवेदनलाई कच्चा राजनीतिक नाटक भनेका छन् । (रासस/एएफपी)
