टेकराज भुसाल, सन्धिखर्क ।

अर्घाखाँची जिल्लाको भूमिकास्थान नगरपालिका–२ ढाकाबाङ भुमेकाथानमा अवस्थित भुमेमन्दिरमा जेठे पूर्णिमाको अवसरमा परम्परागत धार्मिक मेला सम्पन्न भएको छ ।

प्राचीनकालदेखि नै धार्मिक आस्था र सांस्कृतिक परम्पराको केन्द्र रहँदै आएको यस मन्दिरमा प्रत्येक वर्ष जेठे अर्थात् स्थानीय रूपमा प्रचलित भुमेपूर्णिमाका दिन विशेष मेला आयोजना हुँदै आएको हो ।

भुमेदेवताको सम्मानमा स्थापना गरिएको भुमेमन्दिरकै नामबाट भूमिकास्थान नगरपालिकाको नामकरण गरिएको बताइन्छ । यस अवसरमा पालिकाले स्थानीय बिदासमेत दिने परम्परा कायम राखेको छ ।

मेला अवलोकनका लागि भूमिकास्थान नगरपालिकाभित्रका बासिन्दा मात्र नभई अर्घाखाँचीका अन्य पालिकाका साथै छिमेकी जिल्लाहरू प्युठान, गुल्मी, पाल्पा आदिबाट हजारौँ श्रद्धालु तथा दर्शकको उत्साहजनक उपस्थिति देखिएको छ ।

मन्दिर परिसरमा पूजाआजा, स्थानीय सांस्कृतिक प्रस्तुति, परम्परागत नृत्यलगायतका कार्यक्रम सञ्चालन गरिएको थियो । साथै स्थानीय उत्पादनले मेलाको आकर्षण थपेको थियो ।

स्थानीयवासीका अनुसार भुमेदेवताको पूजा गर्दा वर्षभरि राम्रो बाली, सुखसमृद्धि र रोगव्याधिबाट मुक्ति मिल्ने जनविश्वास रहँदै आएको छ ।
भुमेमन्दिरमा आयोजना गरिने मेला केवल धार्मिक गतिविधिमा सीमित नरही त्यस क्षेत्रकै पर्यटन, स्थानीय उत्पादनको प्रवर्द्धन र समुदायबिचको एकताको उत्कृष्ट उदाहरणका रूपमा स्थापित हुँदै गएको छ ।

मेलाको व्यवस्थापनमा भूमिकास्थान नगरपालिका, भुमेमन्दिर व्यवस्थापन समिति, स्थानीय टोल सुधार समिति, युवा क्लब, सुरक्षा निकाय र स्वयम्सेवकको उल्लेखनीय भूमिका देखिएको थियो ।