बेलबारी (मोरङ) । बेलबारी साहित्य विकास समिति,मोरङले पूर्व प्रधानाध्यापकसमेत रहनुभएका साहित्यकार शेरबहादुर खपाङ्गीको ‘तरेलीका पिपिराहरू’ कविता सङ्ग्रह सार्वजनिक गरेको छ ।
२०८२ जेठ १७ गते शनिबार आयोजित एक औपचारिक कार्यक्रममाझ सो कृति सार्वजनिक गरिएको हो ।
सो अवसरमा मन्तव्य राख्दै प्रमुख अतिथि बेलबारी नगरपालिकाका नगरप्रमुख दिलप्रसाद राईले कवि खपाङ्गी अहिले पनि गुरु भएर पाठकलाई राष्ट्रप्रेम, देशभक्ति सिकाइरहेको बताउनुभयो ।
‘विदेश मात्र जाने तथा आफू जन्मेको/हुर्किएको गाउँठाउँलाई छाडेर सुविधासम्पन्न सहरतिर बसाइँ सर्नुले हामीले जन्मथलोलाई माया गरेको ठहर्दैन’ उहाँले यसले गर्दा देशभक्ति भावना कमी हुँदै गइरहेको दाबीसमेत गर्नुभयो ।
कोशी प्रदेशका १४ जिल्लामध्ये खोटाङबाट अन्यत्र बसाइँ सर्नेको सङ्ख्या सबैभन्दा धेरै रहेको अर्थात् खोटाङको जनसङ्ख्या वृद्धिदर ऋणात्मक रहनु खोटाङवासीका लागि अँध्यारो पाटो भएको उहाँको धारणा थियो ।
आफ्नो जमिन हुनेहरूले त्यहाँ गएर केही न केही लगानी गर्न नगरप्रमुख राईले आग्रह गर्नुभयो ।
कवि खपाङ्गीको पहिलो कवितासङ्ग्रहका कविताले जन्मेको माटो, ताते गरेको बाटो र संस्कार, संस्कृतिको पाटोलाई सरल भाषामा बोलेका, वैचारिक दृष्टिकोणले कविता प्रगतिशील रहेका तथा उमेरभन्दा पनि विचार र सक्रियताले व्यक्ति युवा हुने हुँदा ७६ वर्षीय कवि खपाङ्गी युवाकवि भएको समीक्षक ईरानराईले बताउनुभयो ।
कार्यक्रममा बेलबारी प्रज्ञा–प्रतिष्ठानकी अध्यक्ष रेखा सुवेदीले ‘तरेलीका पिपिराहरू’ भित्रकै ‘बिर्सिन सक्दिनँ’ कविता वाचन तथा सङ्गीतकर्मी शेखर थापामगरले कृतिभित्रकै ‘जूनकिरी नानी’ बालकवितालाई गीत बनाएर गाउनुभएको थियो ।
कार्यक्रममा टेकराज एक्चाइमगरले कृतिभित्रका मगरभाषाका तीन कविताको टिप्पणी मगरभाषामै गरी मगरभाषाकै ‘कलाकारिता’ कविता वाचन गर्नुभएको थियो ।
कार्यक्रममा आफू विद्यार्थी छँदैदेखि महाकवि देवकोटा र कविशिरोमणि पौड्यालका कविताबाट प्रभावित भएको, अलिक रउसे भएकाले साहित्य, सङ्गीतमा भाग लिइरहेको र पहाड खोटाङबाट बेलबारी, मोरङमा बसाइँ सरी आएपछि साहित्यिक वातावरण र सङ्गत पाएकोले कवितासङ्ग्रह प्रकाशन गर्न सकेको कवि खपाङ्गीले बताउनुभयो ।
कार्यक्रमका अतिथिमा वरिष्ठ साहित्यकारहरू हर्कमान तामाङ, मधु गुरुङ, जेबी थुलुङ, छवि वैरागी, धनजित पराजुली, यज्ञ सुवेदी सुसेली, गायक सञ्जीव धिमाल तथा क्याम्पस प्रमुख भूपेन्द्रप्रसाद कोइराला र पूर्व शिक्षक बसन्त श्रेष्ठ हुनुहुन्थ्यो ।
कार्यक्रमको अध्यक्षता अध्यक्ष रमेश निरौलाले, स्वागत मन्तव्य उपाध्यक्ष गोविन्दराज चोङबाङले र सञ्चालन सहसचिव विमला सुवेदीले गर्नुभएको थियो ।
कवितासङ्ग्रह ‘तरेलीका पिपिराहरू’ मा ४२ ओटा कविता, आठओटा बालकविता र नेपालीमा अनुवादसहित तीनओटा मगर भाषामा कवित रहेका छन् ।
