बेलबारी (मोरङ) । पूर्वाञ्चल हाइकु सङ्घ कोशी प्रदेशले ‘सुनौलो जून’ संयुक्त हाइकुसङ्ग्रहमाथि चर्चा कार्यक्रम सम्पन्न गरेको छ ।
२०८२ जेठ १७ गते शनिबार बेलबारी बहुमुखी क्याम्पसको सभाकक्षमा सो कार्यक्रम सम्पन्न भएको हो ।
उक्त कृतिमा धेरै उत्कृष्ट हाइकु सङ्गृहीत भएको, प्रकृतिप्रति सम्मान र सामाजिक विकृतिप्रति व्यङ्ग्य रहेको, कतिपय हाइकु हाइकु नभएर सेन्यो भएको समीक्षक विन्दु दहाल ‘मूकदर्शक’ ले बताउनुभयो ।
कार्यक्रमका प्रमुख अतिथि हाइजिन ईरानराईले हाइकु कविताकै लघुत्तम रूप नभएर छुट्टै स्वतन्त्र विधा भएको र नेपालीमा हाइकु लेखिँदा शैलीगत र संरचनागत समस्या भए तापनि आजको व्यस्त समयमा पाठकले हाइकु सजिलै पढ्ने हुनाले गुणात्मक हाइकु लेखिनु आवश्यक रहेको बताउनुभयो ।
अध्यक्षमा हेमसागर
सोही कार्यक्रममा सङ्घको समितिलाई खोटाङका हेमसागर पोखरेलको अध्यक्षतामा पुनरगठन गरिएको छ ।
समितिको उपाध्यक्षमा भोजपुरका इन्द्रासुर बेल्टारे, सचिवमा सङ्खुवासभाका सिजन श्रेष्ठ नयन, सहसचिवमा मोरङकी हीरा खड्का अधिकारी र कोषाध्यक्षमा मोरङकै नवराज पोखरेल ‘नवशिला’ चयन हुनुभएको छ ।
त्यस्तै, सदस्यमा झापाका विन्दु दाहाल ‘मूकदर्शक’, धनकुटाका एवाइ प्रभात, खोटाङका नाकारा र मोरङका हरि कट्टेल चयन हुनुभएको छ ।
आफूले हाइकुबारे धेरै ज्ञान नभएकै बेला २०६७ सालदेखि सङ्घको नेतृत्व गर्ने अवसर पाएको र आफ्नो कार्यकालमा एक सय १६ जनाको संयुक्त हाइकुसङ्ग्रह ‘सम्बन्ध सूत्र’ र पछिल्लो २१ जनाको संयुक्त हाइकुसङ्ग्रह’सुनौलो जून’ प्रकाशन गर्न सकेको आयोजक अध्यक्ष तिला लेकालीले बताउनुभयो ।
कार्यक्रममा प्रलेस, सुनसरी शाखाकी अध्यक्ष विमला पोखरेल र साहित्यकार/पत्रकार केशु विरहीको आतिथ्य रहेको थियो ।
