वासिङटन । राष्ट्रपति डोनाल्ड ट्रम्पले आइतबार अमेरिकाले युरोपेली सङ्घ (इयु) सँग वार्ताका लागि समय पाउन सकियोस् भन्ने उद्देश्यले यसका सामानमाथि ५० प्रतिशत भन्सार शुल्कको कार्यान्वयनलाई जुन १ बाट जुलाई ९ सम्म स्थगित गर्ने बताउनुभएको छ ।
सो सहमति आइतबार युरोपेली आयोगकी अध्यक्ष उर्सुला भोन डेर लेयनसँगको फोनवार्तापछि आएको हो ।
अमेरिकी राष्ट्रपतिका अनुसार भोन डेर लेयनले ट्रम्पलाई उहाँ ‘गम्भीर वार्तामा जान चाहन्छु’ भन्नुभएको थियो ।
वासिङटन फर्कने तयारीका क्रममा न्युजर्सीको मोरिस्टाउनमा आइतबार पत्रकारसँग कुरा गर्दै ट्रम्पले भन्नुभयो– ‘मैले कसैलाई पनि भनेको छु जसले सुन्नुपर्छ, उनीहरूले त्यो गर्नुपर्छ । भोन डेर लेयनले तुरुन्त भेला भएर हामी केही काम गर्न सक्छौँ कि भनेर हेर्ने वाचा गर्नुभयो ।’
शुक्रबारको सामाजिक सञ्जालको पोस्टमा ट्रम्पले २७ सदस्यराष्ट्रको यो समूह व्यापारमा व्यवहार गर्न धेरै गाह्रो रहेको र वार्ता ‘कहीँ पुगिरहेको छैन’ भनी गुनासो गर्दै इयुका सामानमाथि ५० प्रतिशत भन्सार शुल्क लगाउने धम्की दिनुभएको थियो । ती भन्सार शुल्क जुन १ देखि लागु हुने थिए तर भोन डेर लेयनसँगको फोनवार्ताले कमसेकम अहिलेका लागि तनावलाई सहज बनाएको देखिन्छ ।
‘म सन् २०२५ जुलाई ९ सम्म विस्तार गर्न सहमत भएँ, त्यसो गर्नु मेरो सुअवसर थियो’ ट्रम्पले आइतबार साँझ पत्रकारसँग कुरा गरेपछि ट्रुथ सोसलमा भन्नुभयो ।
‘इयु र अमेरिकाले संसारको सबैभन्दा महत्त्वपूर्ण र नजिकको व्यापारिक सम्बन्ध साझा गर्दछन्’ आफ्नो पक्षबाट भोन डेर लेयनले भन्नुभयो– ‘युरोप छिटो र निर्णायक रूपमा वार्ता अगाडि बढाउन तयार छ । राम्रो सम्झौतामा पुग्न, हामीलाई जुलाई ९ सम्मको समय चाहिन्छ ।’ (रासस/एपी)
