देइर अलबालाह (गाजापट्टी) । इजरायली आक्रमणबाट सोमबार रातिदेखि मङ्गलबारसम्म गाजापट्टीमा कम्तीमा ६० जनाको मृत्यु भएको प्यालेस्टिनी अधिकारीले बताएका छन् ।
इजरायलले हालैका दिनमा यस क्षेत्रमा अर्को ठुलो आक्रमण सुरु गरेको छ र हमासले कब्जा गरेका दर्जनौँ बन्धकलाई फिर्ता गर्ने तथा उग्रवादी मूहलाई नष्ट गर्ने लक्ष्य राखेको बताएको छ ।
सोमबार इजरायली प्रधानमन्त्री बेन्जामिन नेतन्याहुले अनिकालको डर उत्पन्न गरेको यस क्षेत्रका २० लाख प्यालेस्टिनीमाथिको नाकाबन्दी हटाउन दबाब दिइएको बताउँदै पहिलोपटक साढे दुई महिनामा गाजामा सहायता ट्रकको सानो सङ्ख्या प्रवेश गर्न अनुमति दिन थाल्नुभएको छ तर संयुक्त राष्ट्र सङ्घका निकायले प्रवेश गरेका थोरै ट्रकहरू खाद्यान्न, औषधी र अन्य आपूर्तिको विशाल आवश्यकता पूरा गर्न कहीँ पनि पर्याप्त नभएको बताएका छन् । यस वर्षको सुरुमा युद्धविरामको समयमा दैनिक छ सय ट्रक प्रवेश गरेका थिए ।
उत्तरी गाजामा एक परिवारको घर र एक विद्यालय बनेको आश्रयमा भएका दुई आक्रमणमा कम्तीमा २२ जनाको मृत्यु भएको र तीमध्ये आधाभन्दा बढी महिला र बालबालिका रहेको गाजा स्वास्थ्य मन्त्रालयले जनाएको छ ।
मध्य सहर देइर अलबालाहमा भएको आक्रमणमा १३ जनाको मृत्यु भएको छ भने नजिकैको निर्मित नुसिरात शरणार्थी शिविरमा भएको अर्को आक्रमणमा १५ जनाको मृत्यु भएको अलअक्सा सहिद अस्पतालले जनाएको छ ।
दक्षिणी सहर खान युनिसमा भएको दुई आक्रमणमा १० जनाको मृत्यु भएको नासेर अस्पतालले जनाएको छ ।
युद्धले प्यालेस्टिनी जनसङ्ख्याको करिब ९० प्रतिशतलाई विस्थापित गरेको छ । तीमध्ये अधिकांश धेरैपटक विस्थापित भएका छन् । (रासस/एपी)
