यरुसलेम । इजरायली सेनाले शुक्रबार गाजा क्षेत्रमा आक्रमण अझ तीव्र बनाएको छ ।
यसअन्तर्गत हवाई बमबारी र थप स्थलसेना पनि पठाइएको जानकारी दिएको छ, जसको उद्देश्य गाजाका केही भागमा नियन्त्रण कायम गर्नु बताइएको हो ।
इजरायली सुरक्षाबलले गिदेओनका रथ नामक नयाँ अभियान सुरु गरिएको जनाएको छ, जसको उद्देश्य युद्धका प्रमुख लक्ष्य बन्धकको मुक्तिमा सहयोग पुऱ्याउनु र हमास नामक समूहको सञ्जाल हटाउनु रहेको छ ।
‘हामी आफ्ना नागरिकको सुरक्षाका लागि काम गरिरहनेछौँ र युद्धका लक्ष्य प्राप्त नहुँदासम्म हाम्रो कारबाही जारी रहनेछ’ सुरक्षाबलको भनाइ छ ।
यसअघि प्रधानमन्त्री बेन्जामिन नेतन्याहुले केही दिनभित्र इजरायली सेना पूर्ण बलका साथ गाजामा प्रवेश गर्ने बताउनुभएको थियो ।
गाजाका स्वास्थ्य अधिकारीका अनुसार, शुक्रबार मात्र उत्तर गाजामा इजरायली बमबारीका कारण कम्तीमा एक सय नौ जनाको मृत्यु भएको छ भने दुई १६ जना घाइते भएका छन् ।
गत वर्ष असोजदेखि सुरु भएको द्वन्द्वमा हालसम्म ५३ हजार ११९ जना मारिएका छन् भने एक लाख २० हजार २१४ जना घाइते भएका छन् ।
हमासले इजरायलमाथि युद्धविरामका लागि भइरहेका पहललाई बेवास्ता गरेको आरोप लगाएको छ । (रासस/सिन्ह्वा)
