बेलबारी (मोरङ) । पूर्वाञ्चल हाइकु सङ्घ, कोशी प्रदेशको आफ्नो दोस्रो हाइकुसङ्ग्रह ‘सुनौलो जून’ सार्वजनिक भएसँगै साहित्यकार ईरानराई सम्मानित हुनुभएको छ ।
२०८२ वैशाख २६ गते शुक्रबार बेलबारी बहुमुखी क्याम्पसको सभाकक्षमा आयोजित औपचारिक कार्यक्रममाझ साहित्यकार राईलाई सम्मान गरिएको हो ।
कार्यक्रमका प्रमुख अतिथि पूर्व सांसद तथा वरिष्ठ साहित्यकार हर्कमान तामाङ, विशिष्ट अतिथि संविधानसभा सदस्य मधु गुरुङ, अध्यक्ष तिला लेकालीलगायत अतिथिले सो कृति सार्वजनिक गर्नुभएको थियो ।
सो अवसरमा मन्तव्य राख्दै अतिथिहरूले ‘सुनौलो जून’ ले नेपाली भाषासाहित्यलाई अझ माथि उकास्ने विश्वास गर्दै सम्मानित हाइकुकार ईरानराई एक कर्मशील साहित्यकार भएको बताउनुभयो ।
त्यसैगरी, विशिष्ट अतिथि गुरुङले हाइकु लेख्न रहर लागे पनि लेख्न थालनी नगरेको स्वीकार गर्दै आफ्नो कविता वाचन गर्नुभएको थियो ।
समीक्षक दार्जिलिङ, सोनादाका साहित्यकार राजेन्द्र प्रधान ‘पासा’ ले यहाँ (नेपालमा) जस्तो उता (दार्लिलिङमा) संस्थागत रूपमा साहित्यिक कार्य गर्न नसकेको, जति पनि कार्य र कार्यक्रम गरिन्छन्, व्यक्तिगत रूपमा गर्दै आएको बताउँदै ‘सुनौलो जून’ एउटा पठनीय कृति भएको बताउनुभयो ।
कार्यक्रममा सम्भवतः नेपालकै सबैभन्दा सानो हाइकुसङ्ग्रहसहित धेरैओटा हाइकुका पुस्तक तथा फुटकर रचना प्रकाशित गरेकोमा ईरानराईलाई सम्मान गरिएको थियो ।
सम्मानित साहित्यकार ईरानराईले नेपाली भाषाको जगेर्ना र विकास गर्ने हो भने नेपाली भाषा, लिपिलाई प्राथमिकता दिनुपर्ने बताए ।
कार्यक्रममा विराटनगर प्रज्ञा–प्रतिष्ठानका सचिव दिनेशराज सुवेदी, दार्जिलिङका अग्रज साहित्यकार मुक्तिनाथ शोषित, दीप मङ्ग्राती, धनजित पराजुली, चूडामणि नेपाल ‘अकिञ्चन’ अतिथि हुनुहुन्थ्यो ।
कृतिमा मोरङका ईरानराई, चूडामणि नेपाल ‘अकिञ्चन’, डी.बी. बस्नेत, तिला लेकाली, नवशिला, बाबुराम पोखरेल, मिश्र वैजयन्ती, राजु परियार, विश्वविश्रुत विकास, हरि कट्टेल र हिरा खड्का अधिकारी, सुनसरीका शुक्रराज कुँवर, उदयपुरका सृजना सरोवर, ओखलढुङ्गाका चेतनाथ धमला, खोटाङका हेमसागर पोखरेल र नाकारा, भोजपुरका इन्द्रासुर बेल्टारे, धनकुटाका एवाइ प्रभात, सङ्खुवासभाका सिजन श्रेष्ठ ‘नयन’, इलामका एकु घिमिरे तथा सिन्धुलीका दिल पौडेल गरी २१ जनाको ५० ओटाका दरले एक हजार ५० ओटा हाइकु सङ्गृहीत छन् ।
कार्यक्रमको सञ्चालन उपाध्यक्ष हेमसागर पोखरेलले र स्वागत मन्तव्य सदस्य सिजन श्रेष्ठ ॅनयन’ ले गर्नुभएको थियो ।
कार्यक्रममा विभिन्न साहित्यकारले हाइकु वाचन गर्नुभएको थियो ।
