काठमाडौँ । अखिल (छैठौं) केन्द्रीय कार्यालयले विद्यार्थी सहिद मित्रमणि आचार्य स्मृतिदिवस कार्यक्रम सम्पन्न गरेको छ ।
केन्द्रीय कार्यालयको आयोजनामा २०८२ वैशाख १८ गते बिहीबार केन्द्रीय कार्यालय बागबजारमा सहिद मित्रमणिको चालिसौँ स्मृतिदिवस सम्पन्न भएको हो ।
कार्यक्रमको प्रमुख अतिथि महासचिव पुरन पोख्रेल तथा विशेष अतिथि अखिल नेपाल जनजाति सम्मेलनका अध्यक्ष निमबहादुर बुढाथोकी र अखिल (छैठौं) केन्द्रीय कोषाध्यक्ष समष्टि बुढा हुनुहुन्थ्यो ।
सहिद मित्रमणिको फोटोमा प्रमुख अतिथि पोख्रेलले द्वीप प्रज्ज्वलनसँगै माल्यार्पण गर्नुभएको थियो ।
कार्यक्रममा उहाँले सहिद मित्रमणिको जीवनी र आन्दोलनकाबारे प्रकाश पार्दै नेपालको कम्युनिस्ट आन्दोलनमा साथै नेपालको विद्यार्थी आन्दोलनमा उहाँको आज पनि उत्तिकै महत्त्व रहेको बताउनुभयो ।
त्यस्तै, उहाँले अखिल (छैठौं) ले सहिद मित्रमणिले लिनुभएको विचार, अनुशासन, नेपालको शिक्षाप्रणाली, राजनैतिक सामाजिक आन्दोलन र आदर्श व्यक्तित्वको अनुशरण गर्ने बताउनुभयो ।
कार्यक्रमको सञ्चालन युनियनका केन्द्रीय सदस्य मदन भुसालले गर्नुभएको थियो ।
विद्यार्थी सहिद मित्रमणि आचार्य को हन् ?
सहिद मित्रमणि नेपाली क्रान्तिकारी विद्यार्थी आन्दोलनका एक अमर योद्धा थिए, जसले जनतन्त्र, सामाजिक न्याय र शोषण विरोधी सङ्घर्षमा आफ्नो जीवन समर्पण गरे ।
प्रारम्भिक जीवन र शिक्षा
आचार्यको जन्म २०१९ असार ११ गते प्युठान जिल्लाको रम्दी गाउँपालिका–२ तिघ्रामा भएको थियो । उनका बुबा रेशमराज आचार्य र आमा पिताम्बरदेवी आचार्य थिए । प्रारम्भिक शिक्षा गाउँकै विद्यालयमा प्राप्त गरेपछि उनले २०३५ सालमा रातामाटा माध्यमिक विद्यालयबाट एसएलसी उत्तीर्ण गरे । त्यसपछि २०३६ सालमा भैरहवाको पक्लिहवा कृषि क्याम्पसमा कृषि विज्ञान विषयमा अध्ययन गर्न थाले । २०३९ सालमा चितवनको रामपुर कृषि क्याम्पसमा स्नातक तहको अध्ययनका लागि भर्ना भए ।
राजनीतिक क्रियाशीलता
विद्यार्थी जीवनदेखि नै मित्रमणि सामाजिक अन्याय र शोषण विरुद्ध सचेत थिए । पक्लिहवा क्याम्पसमा अध्ययन गर्दादेखि नै उनी अनेरास्ववियुमा सक्रिय भए । २०३८ सालमा अनेरास्ववियु रुपन्देही जिल्ला समितिको सचिव र क्याम्पस स्ववियु सभापति पदमा निर्वाचित भए । रामपुर क्याम्पसमा अध्ययन गर्दा पनि उनी अनेरास्ववियुका केन्द्रीय सदस्य र क्याम्पस स्ववियु सभापति पदमा निर्वाचित भए ।
सहादत
२०४२ वैशाख १८ गते चितवनको मेघौलीमा राजनीतिक विवादका क्रममा नेपाली काङ्ग्रेस निकट नेपाल विद्यार्थी सङ्घका कार्यकर्ताले उनलाई भाला, छुरी र साइकलको चेन प्रयोग गरी निर्ममतापूर्वक आक्रमण गरे । गम्भीर घाइते मित्रमणिको उपचारका क्रममा निधन भयो । उनको बलिदानलाई सम्झनाका लागि प्रत्येक वर्ष वैशाख १८ गते मित्रमणि स्मृतिदिवस मनाइन्छ । प्युठानको विजुवारमा उनको स्मृतिमा सहिद स्तम्भ पनि निर्माण गरिएको छ ।
स्मरण
मित्रमणि आचार्यको जीवन र बलिदानले नेपाली विद्यार्थी आन्दोलनमा महत्त्वपूर्ण प्रेरणा प्रदान गरेको छ । उनको निष्ठा, साहस र नेतृत्व क्षमताले आज पनि युवालाई प्रेरित गरिरहेको छ ।
