काठमाडौँ । अखिल नेपाल शिक्षक संघका अध्यक्ष सानोभाइ कार्कीले शनिबार (१३ वैशाख) मा सरकारसँग निर्णायक वार्ता हुनसक्ने बताउनुभएको छ ।
सरकार र आन्दोलनरत शिक्षकबीच शनिबार बिहान ७ः३० बजे हुने वार्ता निर्णायक हुनसक्ने अध्यक्ष कार्कीको विश्वास छ।
‘आज हामी सबैलाई भित्र (सिंहदरबार) जान दिइएन। जान नदिएपछि हामी आफ्नै आन्तरिक छलफलमा लाग्यौँ,’ कार्कीले भन्नुभयो, ‘भोलि बिहान छलफलमा बस्ने भनिएको छ। सायद यो छलफल निर्णायक हुन्छ।’
यता शिक्षा, विज्ञान तथा प्रविधि मन्त्रालयले सर्वोच्च अदालतले बिहीबार जारी गरेको आदेश आज प्राप्त भएको र उक्त आदेशअनुसार नेपाल शिक्षक महासंघसँग छलफल गर्न लागिएको जनाएको छ।
मन्त्रालयले शिक्षक महासंघका अध्यक्षसहित पदाधिकारीलाई छलफलमा सहभागी हुन आह्वान गरेको छ।
शिक्षा मन्त्रालयका सहसचिव युवराज पौडेलले विज्ञप्ति जारी गरी शिक्षकहरूसँग भोलि बिहान वार्ता गर्न लागिएको बताएका छन् ।
पौडेलले जारी विज्ञप्तिमा वार्ता र संवादका माध्यमबाट आन्दोलनरत शिक्षकका समस्या समाधान गर्न शिक्षामन्त्री रघुजी पन्तले आह्वान गरेको उल्लेख छ।
मन्त्रालयले आजको बैठक कारणवस हुन नसकेको पनि भनेको छ। मन्त्रालयले के कारणले वार्ता नभएको भन्ने नखुलाए पनि वार्ताका लागि शिक्षकहरूले सिंहदरबार प्रवेश पास नपाएपछि आजको वार्ता हुन नसकेको हो।
शिक्षक नेता सानुभाइ कार्कीका अनुसार यसअघि मन्त्रालय प्रवेश गर्ने पास देखाए प्रवेश नदिइएको र छुट्टै पास मागेपछि शिक्षकका प्रतिनिधिहरू सिंहदरबार गेटबाटै फर्किएका थिए।
अध्यक्ष कार्कीका अनुसार महासङ्घसित सल्लाह नै नगरी सरकारले एकतर्फी रूपमा वार्ताटोली गठन गरिएपछि आज वार्ता हुन सकेन । शिक्षा मन्त्रालयले वार्ताका लागि नामै तोकेर २५ जनालाई बोलाएको थियो ।
अध्यक्ष कार्कीले युगदर्शनसित भन्नुभयो– ‘महासङ्घसित सल्लाह नै नगरी सरकारले एकतर्फी रूपमा वार्ताटोली गठन गरेको थियो । त्यो लिस्ट मिडियामा आइसकेको थियो । त्यसैले आज वार्ता हुन सकेन ।’
विद्यालय शिक्षा एेन माग गर्दै शिक्षकहरू गएको चैत २० गतेदेखि काठमाडौँ केन्द्रित आन्दोलनमा छन् ।
