काठमाडौँ । अखिल नेपाल प्रगतिशील लेखक सङ्घ (अन्पा) ले प्रकाश थापामगरको कथासङ्ग्रह ॅप्रवेश निषेध’ को समीक्षा कार्यक्रम सम्पन्न गरेको छ ।
प्राडा गोपीन्द्र पौडेलको प्रमुख उपस्थितिमा २०८२ वैशाख ५ गते शुक्रबार भर्चुअल माध्यमबाट सो कार्यक्रम सम्पन्न भएको हो ।
अन्पाका अध्यक्ष समीर सिंहको अध्यक्षता तथा महासचिव भीष्म जोशीको सञ्चालनमा अघि बढेको कार्यक्रममा मन्तव्य राख्दै प्राडा पौडेलले’प्रवेश निषेध’ कथासङ्ग्रहमा गम्भीरता, सचेतता र समर्पण देखिएको बताउनुभयो ।
‘कथा भन्ने शैलीमा गम्भीरता छ साथै लेखकको कथाकथन गर्ने सिप राम्रो छ’ उहाँले भन्नुभयो– ‘केही कमजोरीलाई सुधार गर्दा लेखकबाट अझै उत्कृष्ट रचना आउनु सम्भव छ ।
उहाँले सङ्ग्रहको कमीकमजोरीको उजागर गर्दै पात्र कमजोर भएको तथा घटना प्रतिनिधिमूलक नभएको बताउनुभयो ।
त्यस्तै, उहाँले कथामा द्वन्द्व कमजोर भएको, फलस्वरूप पात्र गतिशील हुन नसकेको र यथार्थमध्ये मुख्य विषयवस्तु पक्रिन नसकेको बताउनुभयो ।
सङ्ग्रहको गुणदोषमा प्रवेश गर्नुअघि प्राडा पौडेलले कथाको संरचना र सिद्धान्तको बारेमा सङ्क्षिप्तमा चर्चा गर्नुभएको थियो ।
कार्यक्रमको पूर्वार्द्धमा अध्यक्षता ग्रहण गर्दै समीर सिंहले लेखक र कृतिको बारेमा सङ्क्षिप्त जानकारी दिनुभएको थियो भने लेखक थापामगरले कृतिसिर्जनासित सम्बन्धित सङ्क्षिप्त धारणा राख्नुभएको थियो ।
