काठमाडौँ । शिक्षक महासङ्घको आन्दोलनका कारण कक्षा १२ को परीक्षा अनिश्चित बनेको छ साथै महासङ्घले निजी विद्यालयका सङ्गठन प्याब्सन/एनप्याब्सनलाई आन्दोलनमा आउन अपिल गरेको छ ।
महासङ्घका अध्यक्ष लक्ष्मीकिशोर सुवेदी र महासचिव तुलाबहादुर थापाले २०८२ वैशाख १ गते जारी गरेको प्रेसविज्ञप्तिमा सो जानकारी दिइएको हो ।
विज्ञप्तिमार्फत् आन्दोलनरत नेपाल शिक्षक महासङ्घले कक्षा १२ को परीक्षा, भर्ना अभियान लगायत कुनै पनि शैक्षिक गतिविधिमा सामेल नहुन आग्रह गरेको छ ।
चैत २० गतेबाट शिक्षकको राजधानीकेन्द्रित आन्दोलन जारी छ । सोही क्रममा महासङ्घले विज्ञप्ति जारी गर्दै वैशाख ११ गतेबाट सुरु हुने कक्षा १२ को परीक्षामा केन्द्राध्यक्ष, निरीक्षकलगायत कुनै पनि काममा संलग्न नहुन प्रधानाध्यापक, शिक्षक र कर्मचारीलाई आग्रह गरेको छ ।
त्यस्तै, शीघ्रताका साथ शिक्षा ऐन जारी गरेर विद्यालय शिक्षाको उचित व्यवस्थापन र गुणस्तर विकासका लागि गरिएको आन्दोलनलाई सहयोग गर्न पनि आग्रह गरिएको छ ।
काठमाडौँकेन्द्रित आन्दोलनको अवधिमा उत्तरपुस्तिका परीक्षण, नतिजा प्रकाशन, प्रवेश परीक्षा, विद्यार्थी भर्नालगायतका सबै काममा संलग्न नहुन पनि आग्रह गरिएको छ ।
त्यसैगरी, विज्ञप्तिमा निजी विद्यालयको दुईओटा सङ्गठन प्याब्सन र एनप्याब्सनलाई पनि आन्दोलनमा आउन आग्रह गरेको छ ।
सभामुखको चासो
यता, आन्दोलनरत शिक्षकका माग सम्बोधनबारे सरकारको तयारी तथा समितिको प्रगतिबारे सभामुख देवराज घिमिरेले शिक्षा, विज्ञान तथा प्रविधिमन्त्री विद्या भट्टराई र शिक्षा समितिको विद्यालय शिक्षा उपसमितिका संयोजक छविलाल विश्वकर्मासँग भेट गर्नुभएको छ ।
गत शुक्रबार भएको भेटमा शिक्षामन्त्री भट्टराईले मन्त्रिपरिषद् र मन्त्रालयले गर्न सक्ने निर्णय तत्काल गरेर संसद्को आगामी अधिवेशनको पहिलो साता नै शिक्षा विधेयक संसद्मा पेस गर्ने गरी शिक्षक र सरकारबिच संवाद भइरहेको जानकारी दिनुभयो ।
सेवासुविधाको विषय अर्थ मन्त्रालयसँग पनि जोडिएकाले उपप्रधान तथा अर्थमन्त्रीसँग छलफल गरेको उहाँको भनाइ थियो ।
त्यस्तै, विश्वकर्माले उपसमितिले विधेयकका १६३ ओटा दफामध्ये अहिलेसम्म ८२ ओटा दफामा छलफल गरेर निष्कर्षमा पुऱ्याएको जानकारी दिनुभयो ।
सभामुख घिमिरेले शिक्षकका मागबारे गम्भीर भएर काम गर्न सरकार र समितिको ध्यानाकर्षण गराएका छन् ।
