प्रकाश थापामगर/गोविन्दकुमार शर्मा, काठमाडौँ ।
प्रगतिशील लेखक सङ्घका उपाध्यक्ष तथा अखिल नेपाल प्रगतिशील लेखक सङ्घ (अन्पा) का अध्यक्ष समीर सिंहले साहित्यको क्षेत्रबाट आमूल परिवर्तनको पक्षमा काम गर्नु आफूहरूको गन्तव्य भएको बताउनुभएको छ ।
२०८१ चैत २० गते बुधबार युगदर्शन मिडियाका लागि अन्तर्वार्ता दिँदै उहाँले यस्तो अभिव्यक्ति दिनुभएको हो ।
‘हामीले लेखनको क्षेत्रबाट, साहित्यको क्षेत्रबाट जुन हस्तक्षेपका कुरा गर्छौं, त्यो लेख्ने वा प्रश्न उठाउनका लागि मात्रै होइन, आलोचनाका लागि मात्रै होइन, विरोध गर्नका लागि मात्रै होइन’ उहाँले भन्नुभयो– ‘साहित्यको क्षेत्रबाट हाम्रो गन्तव्य आमूल परिवर्तन नै हो ।’
सङ्घीयताको सन्दर्भमा सोधिएको प्रश्नमा उहाँले प्रलेसमा यसबारे साझा धारणा कायम हुन नसकेको जानकारी दिनुभयो ।
उहाँले भन्नुभयो– ॅसङ्घीयताको विषयमा प्रलेसले आफ्नो धारणा बनाएर अगाडि बढ्न सक्नु अहिलेको सन्दर्भमा त्यो परिस्थिति छैन ।’
अन्पाका अध्यक्षसमेत रहनुभएका सिंहले आफ्नो सङ्गठन सङ्घीयताको बारेमा स्पष्ट रहेको बताउनुभयो ।
‘सङ्घीयतालाई खारेज गर्नुपर्दछ । अखिल नेपाल प्रगतिशील लेखक सङ्घ यो विषयमा प्रष्ट छ’ उहाँले भन्नुभयो– ‘देशमा सङ्घीयता खारेज गर्नका लागि अखिल नेपाल प्रगतिशील लेखक सङ्घको सशक्त भूमिका हुनेछ ।’
आगामी चैत २३ र २४ गते काठमाडौँमा प्रलेसको तेह्रौँ राष्ट्रिय सम्मेलन सम्पन्न हुन गइरहेकोमा उहाँले सम्मेलनले विभिन्न एजेन्डामा छलफल गरेर ठोस योजना बनाइने बताउनुभयो ।
राष्ट्रिय सम्मेलनमा अन्पासम्बद्ध साहित्यकारले पाउने नेतृत्वको बारेमा प्रश्न गर्दा उहाँले भन्नुभयो– ‘पदका लागि मरिहत्ते गर्ने, पद नपाए कार्यक्रम बहिष्कार गर्ने वा बाहिर हुनेजस्तो स्कुलिङ छैन ।’
प्रलेस वैचारिक रूपमा सामन्तवाद र साम्राज्यवाद विरुद्ध साहित्यलेखन र सांस्कृतिक क्षेत्रमा क्रियाशील साझा सामूहिक सङ्घसंस्थाको रूपमा रहेको उहाँको भनाइ थियो ।
‘हाम्राबिचमा भएका जे कुरामा सहमति हुन्छ, त्यही कुरा बाहिर ल्याउँछौँ’ उहाँले भन्नुभयो– ‘जुन कुरामा सहमति हुँदैन, आफ्ना सांस्कृतिक मोर्चामा त्यसबारे भूमिका निर्धारण गर्न सकिहाल्छौँ ।’
लेखकले लेखनबाटै हस्तक्षेप गर्ने जानकारी दिँदै उहाँले राजनीतिक दलले जस्तो भूमिका प्रलेसले खेल्न नसक्ने स्पष्ट पार्नुभयो ।
‘गलत चिज वा प्रतिक्रियावादी सत्तालाई प्रहार गर्ने कुरामा हामी निरन्तर क्रियाशील छौँ’ एमसिसी पारित भएको सन्दर्भ जोड्दै सिंहले भन्नुभयो–’एमाले, माओवादी पार्टी सत्तापक्षीय हो, उनीहरूले एमसिसीमा हस्ताक्षर गरे भनेर प्रलेस त्यही बाटोमा त गएन नि ।’
प्रलेसले कुनै पार्टीमा प्रतिबद्ध नभएको तर वैचारिक रूपमा प्रतिबद्ध छ प्रगतिशील लेखक, साहित्यकारलाई समेट्ने गरेको उहाँको भनाइ थियो ।
उहाँको भनाइ थियो–’धेरैभन्दा धेरै साहित्यकार, लेखकलाई समेट्न सकौँ भनेर नाम प्रगतिशील राखे पनि मूल रूपमा प्रगतिवाद नै हाम्रो लक्ष्य हो ।’
प्रलेसबाट बाहिर रहेका एउटा समूहको बारेमा उहाँको भनाइ थियो–’वैद्यहरू प्रलेस सत्तापक्षीय भयो, यसले राम्रो भूमिका दिन सकेन, प्रतिध्रुवीय अडान राख्न सकेन भनेर अहिले बाहिर हुनुहुन्छ तर पनि हामी वार्ता गरिरहेका छौँ । उहाँहरू सकारात्मक हुनुहुन्छ ।’
