काठमाडौँ । विद्यालय शिक्षा ऐन जारी गर्न माग गर्दै नेपाल शिक्षक महासङ्घले भोलि चैत २० गतेदेखि अनिश्चितकालीन शैक्षिक सडक आन्दोलन सञ्चालन गर्ने भएको छ ।
महासङ्घको राष्ट्रिय समितिले २०८१ चैत १९ गते मङ्गलबार जारी गरेको प्रेसविज्ञप्तिमार्फत् सो जानकारी दिइएको हो ।
यस अवधिमा महासङ्घले ‘काठमाडौँ जाऔँ’ अभियान सञ्चालन गर्ने जानकारी पनि दिएको छ ।
महासङ्घको राष्ट्रिय समितिले जारी गरेको परिपत्रअनुसार भोलिदेखि सुरु हुने तेस्रो चरणको आन्दोलनको पहिलो दिन चैत २० गतेको कार्यक्रम दिउसो १ बजेदेखि ४ बजेसम्म माइतीघर मण्डलादेखि बानेश्वर खण्डको एभरेस्ट होटेलसम्म धर्ना दिइनेछ भने त्यसपछि चैत २१ गतेयताका कार्यक्रम बिहान ११ बजेदेखि दिउसो ४ बजेसम्म सोही स्थानमा चल्नेछ ।
धर्ना कार्यक्रममा उपस्थितिका लागि महासङ्घले प्रदेशगत हिसाबले स्थान तोकेको छ । त्यसअनुसार बागमती कोशी प्रदेशका शिक्षक माइतीघर मण्डलातिरबाट धर्नामा बस्नुहुनेछ भने लुम्बिनी र गण्डकी प्रदेशका शिक्षक नयाँबानेश्वर एभरेस्ट होटेलतर्फबाट बस्नुहुनेछ ।
त्यस्तै, बिच भागमा मधेस, कर्णाली र सुदूरपश्चिम प्रदेशका शिक्षकहरू धर्नामा बस्नुहुनेछ ।
आन्दोलनमा सहभागी शिक्षक–कर्मचारीका लागि तोकिएको पोसाक र विद्यालयको परिचयपत्र अनिवार्य गरिएको छ ।
आन्दोलनलाई सभ्य बनाउन आन्दोलन परिसरमा बोटबिरुवा, दुबो, ट्राफिक डिभाइडर तथा अन्य भौतिक वस्तुको सुरक्षा आफैले गर्ने, आफूले खाएको पानीको बोटल, खाजा खाँदालगायतको फोहर डस्टबिनमा फाल्ने तथा कुनै पनि खालको कागज, प्लास्टिक वा अन्य प्रकारको फोहर नफाल्न परिपत्र नै जारी गरिएको छ ।
प्रेसविज्ञप्ति र परिपत्रमा अध्यक्ष लक्ष्मीकिशोर सुवेदी र महासचिव तुलाबहादुर थापाको हस्ताक्षर रहेको छ ।
माघ २० गतेबाट आन्दोलनमा रहेको महासङ्घले पहिलो चरणको आन्दोलनअन्तर्गत पालिका, जिल्ला र प्रदेश तहमा आन्दोलन गरेको थियो भने फागुन २४ गते काठमाडौँमा जुलुस तथा विरोध सभा गरेको थियो ।
त्यसैगरी, दोस्रो चरणको आन्दोलन फागुन २७ गतेबाट चैत ५ गतेसम्म राजनीतिक दलका केन्द्रीय कार्यालयमा धर्ना, चैत ७ गतेदेखि १५ गतेसम्म शिक्षा तथा मानव स्रोत विकास केन्द्रको कार्यालय परिसरमा रिले अनशन बसेको थियो ।
“शिक्षक महासङ्घ र सरकारबिच विगतमा भएका सबै सहमति सम्बोधन हुने गरी गुणस्तरीय विद्यालय शिक्षा, विद्यार्थी र शिक्षक–कर्मचारीमैत्री अग्रगामी विद्यालय शिक्षा ऐन जारी गराउन राज्यपक्षलाई बाध्य पार्नु यस आन्दोलनको उद्देश्य हो” महासङ्घको विज्ञप्तिमा भनिएको छ– “यो उद्देश्यप्राप्तिका लागि हामीले गर्ने आन्दोलन शान्तिपूर्ण, अनुशासित र मर्यादित हुनेछ ।”
यो आन्दोलन शिक्षक–कर्मचारीको पेसागत मागमुद्दा सम्बोधनसँग मात्र जोडिएको नभएर यसले गुणस्तरयुक्त विद्यालय शिक्षा तथा विद्यार्थीको हित र उन्नयनका पक्षमा समेत आवाज मुखरित गरेको महासङ्घको दाबी छ ।
आन्दोलनमा स्थायी, राहत, साविक उमावि, सिकाइ अनुदान, बालविकास कक्षा, अस्थायी/करार, प्राविधिक धार, विशेष शिक्षा तथा संस्थागत विद्यालयलगायत सबै प्रकृतिका शिक्षक तथा विद्यालय कर्मचारीको सहभागिता रहने महासङ्घले जानकारी दिएको छ ।
