जेनेभा । विश्व स्वास्थ्य सङ्गठन (डब्लुएचओ) ले म्यानमारमा गएको भूकम्प उच्चस्तरीय आपतकालीन अवस्था भएको बताउँदै जीवन रक्षा र रोगको प्रकोप रोक्न तत्काल ८० लाख अमेरिकी डलर माग गरेको छ ।
डब्लुएचओले देशमा सीमित शल्यक्रिया क्षमताका कारण ठुलो सङ्ख्यामा हताहत र आघातमा घाइते भएकाहरू सङ्क्रमणको उच्च जोखिममा रहेको र त्यसले रोगको जोखिम बढाउने सम्भावना रहेको बताएको छ ।
“डब्लुएचओले यस सङ्कटलाई तेस्रो तहको सङ्कटका रूपमा वर्गीकृत गरेको छ, जुन यसको इमर्जेन्सी रेस्पोन्स फ्रेमवर्कअन्तर्गत सक्रियताको उच्चतम स्तर हो” संयुक्त राष्ट्रसङ्घीय स्वास्थ्य निकायले कोषका लागि गरेको अपिलमा भनिएको छ ।
म्यान्मारको मान्डले सहरनजिकै शुक्रबार ७.७ म्याग्निच्युडको भूकम्प गएको थियो भने त्यसको केही मिनेटपछि ६.७ म्याग्निच्युडको परकम्प गएको थियो । भूकम्पका कारण म्यानमारमा एक हजार ७०० भन्दा बढी र छिमेकी मुलुक थाइल्यान्डमा कम्तीमा १८ जनाको मृत्यु भएको छ ।
“प्रारम्भिक आँकलनले म्यान्मारमा हताहत हुने र आघातसँग सम्बन्धित घाइतेको सङ्ख्या उच्च रहेको देखिन्छ । विद्युत् र पानीको आपूर्ति अवरुद्ध भएको छ† स्वास्थ्य सेवाको पहुँच बिग्रिरहेको छ र पानीजन्य र खाद्यजन्य रोगको प्रकोपको जोखिम बढेको छ” डब्लुएचओले भनेको छ।
आघातसँग सम्बन्धित चोट हातखुट्टा वा शरीरका अन्य भागको हाड भाँचिने, चर्किने, खुला घाउसहित सीमित शल्यचिकित्सा क्षमता र अपर्याप्त सङ्क्रमण रोकथाम र नियन्त्रणको कारण सङ्क्रमण र जटिलताको उच्च जोखिम छ । (रासस/एएफपी)
