काठमाडौँ । रक्तिम सांस्कृतिक अभियानको सङ्घीयता विरोधी सडक सांस्कृतिक कार्यक्रम सुरु भएको छ ।
राष्ट्रिय जनमोर्चाद्वारा चैत २४–३० गतेसम्म आयोजित सङ्घीयता खारेजीका लागि काठमाडौँकेन्द्रित आन्दोलनको तयारीस्वरूप २०८१ चैत १६ गते शनिबारदेखि सो कार्यक्रम सुरु भएको हो ।
कार्यक्रमअन्तर्गत काठमाडौँको स्वयम्भू, कलङ्की र माछापोखरीमा रक्तिमका कलाकारहरूले प्रस्तुति दिएका थिए ।
जनताले विशेष रुचिका साथ अवलोकन गरेको सो कार्यक्रममा हालै रेकर्ड गरिएको नयाँ गीत ‘किन चाहियो सङ्घीयता’, ‘मलाई डर छैन’ (कमेडी), ‘देश जान थाल्यो’, ‘शिशिर चिर्ने’, ‘उस्तै छ हामीलाई पिरलो’ लगायतका गीतमा प्रस्तुति दिइएको थियो ।
रक्तिमका केन्द्रीय अध्यक्ष गिरिप्रसाद बुढा, महासचिव हेमराज आश्रम, केन्द्रीय सदस्यहरू उषा तारामीमगर, मानबहादुर नेपाली, क्षितिजा राहादी, विन्दु परियार, हरि सर्तुङीलगायतको उपस्थितिमा कार्यक्रम अगाडि बढिरहेको छ ।
त्यस्तै, कार्यक्रममा युजिन श्रेष्ठ, रमेश पुन, भुमा श्रीस, झविन्द्र नेपाली, प्रेनिला ज्ञामीमगर, समष्टि बुढालगायत सहभागी हुनुहुन्छ ।
कार्यक्रम सफल बनाउन राजमो काठमाडौँका छवि खनाल, ऋतु केसी, हिमालविक्रम सिंह, छविलाल गैरेलगायतका नेताकार्यकर्ताले व्यवस्थापकीय भूमिका निर्वाह गर्नुभएको थियो ।
स्वयम्भुको कार्यक्रममा नेकपा (मसाल) काठमाडौँका प्रवक्ता जगत् रेग्मीले मन्तब्य राख्नु भएको थियो भने माछापोखरीमा भएको कार्यक्रममा अखिल (छैठौं) का अध्यक्ष सुवास जिसीले मन्तव्य राख्नुभएको थियो ।
रक्तिमका अध्यक्ष गिरीप्रसाद बुढाको नेतृत्वमा अगाडि बढिरहेको सडक कार्यक्रमको सञ्चालन महासचिव हेमराज आश्रमले गर्दै आउनुभएको छ ।
