मस्को । क्रेमलिनले आइतबार प्रसारित टिप्पणीमा अमेरिकाको विदेश नीतिमा नाटकीय परिवर्तन मूलतः यसको आफ्नै दृष्टिकोणसँग मिल्दोजुल्दो रहेको दाबी गरेको छ ।
रुसले भनेको छ– अमेरिकी राष्ट्रपति डोनाल्ड ट्रम्पले जनवरीमा पदभार ग्रहण गरेदेखि नै राष्ट्रपति भ्लादिमिर पुटिनसँग सम्पर्क गरेर मस्कोसँग सम्बन्ध निर्माण गर्न खोज्नुभएको छ र संयुक्त राष्ट्र सङ्घमा रुसको पक्षमा उभिनुभएको छ ।
‘नयाँ प्रशासनले विदेशनीतिका सबै संरचना द्रुत गतिमा परिवर्तन गरिरहेको छ । यो धेरै हदसम्म हाम्रो दृष्टिकोणसँग मेल खान्छॅ क्रेमलिनका प्रवक्ता दिमित्री पेसकोभले सरकारी टेलिभिजनका एक पत्रकारलाई भन्नुभयो–’अझै लामो बाटो तय गर्नुपर्नेछ किनकि द्विपक्षीय सम्बन्धको सम्पूर्ण परिसरमा ठुलो क्षति भएको छ तर यदि दुई नेताहरू राष्ट्रपति पुटिन र राष्ट्रपति ट्रम्पको राजनीतिक इच्छाशक्ति कायम रहेमा यो मार्ग निकै छिटो र सफल हुन सक्छ ।’
पेस्कोभले यी टिप्पणी बुधबार गर्नुभए पनि ती टिप्पणी आइतबार मात्र सार्वजनिक गरिएका थिए ।
शुक्रबार ह्वाइट हाउसमा एक आश्चर्यजनक टेलिभिजन भिडन्तमा युक्रेनी राष्ट्रपति भ्लोदिमर जेलेन्स्कीलाई हप्काउँदै ट्रम्पले मस्कोसँग आफूलाई अझ जोड्नुभएको छ ।
२०२२ फेब्रुअरीमा आफ्नो छिमेकी विरुद्ध पूर्ण सैन्य आक्रमण सुरु गरेको मस्कोले अमेरिकाका पूर्वराष्ट्रपति जो बाइडेनले युक्रेनलाई बिनाशर्त समर्थन गर्नुभएकोमा निन्दा गरेको थियो । (रासस/एएफपी)
