ढाका । विद्यार्थीहरूले पदच्यूत पूर्व नेता शेख हसिनाका पिताको सङ्ग्रहालय भत्काउन सुरु गरेको केही घन्टापछि सयौँ बङ्गलादेशी प्रदर्शनकारीले बिहीबार हसिनासँग सम्बन्धित भवन भत्काएका छन् ।
हसिनाका पिता एवम् बङ्गलादेशका प्रथम राष्ट्रपति शेख मुजिबुर रहमानको घर र सङ्ग्रहालयमा गत वर्ष विद्यार्थी नेतृत्वको क्रान्तिको क्रममा आगो लगाइएको थियो । उक्त क्रान्तिले हसिनाको १५ वर्षको निरङ्कुश शासनको अन्त्य गरेको थियो ।
हसिनाले अगस्ट ५ मा हेलिकोप्टरबाट पुरानो मित्रराष्ट्र भारततर्फ उडान भरेको ठिक छ महिनापछि बुधबार राति हथौँडा र धातुका डन्डा बोकेको भिडले राजधानी ढाकाको भवनको पर्खाल भत्काउन थाल्यो ।
नरसंहारको मुद्दामा ढाकामा मुद्दाको सामना गर्न पक्राउ पुर्जीको अवज्ञा गरिरहनुभएकी ७७ वर्षीया हसिना निर्वासनबाट फेसबुक प्रसारणमा देखा पर्ने रिपोर्टको प्रतिक्रियामा विरोध प्रदर्शन भड्किएको थियो । बिहीबार बिहान बाँकी रहेको आगोले कालो पारेका पर्खाल भत्काउन डिगर प्रयोग गरिँदै थियो ।
प्रदर्शनकारीले हसिनाका दिवङ्गत पतिको ढाकाको घरमा भएको आगलागीसहित हसिनासँग सम्बन्धित देशभरका अन्य घरमा पनि तोडफोड र आगो लगाइदिए । सबैभन्दा ठुलो बङ्गाली दैनिक प्रथम आलोले खुल्ना सहरमा हसिनाको परिवारको स्वामित्वमा रहेको भवन ध्वस्त पार्न भिडले सरकारी स्वामित्वको उत्खनन यन्त्र प्रयोग गरेको रिपोर्ट गरेको छ ।
पश्चिमी सहर कुस्टियामा प्रदर्शनकारीले हसिनाको अवामी लिग पार्टीका नेता महबुबुल आलम हनिफको घरमा तोडफोड गरेका छन् । चटगाँवमा प्रदर्शनकारीले मसाल जुलुस निकालेर शेख मुजिबुर रहमानको भित्तेचित्र तोडफोड गरे ।
अन्तरिम सरकारले आक्रमणको लहरबारे कुनै औपचारिक टिप्पणी गरेको छैन र सुरक्षा बलहरूले प्रदर्शनकारीलाई भवनमा आक्रमण गर्न दिएर हेरिरहे ।
छिमेकका एक निजी सुरक्षा गार्डले परिवारहरूले भरिएका नजिकैका भवनमा आगो फैलिने डरले उनले फायर सर्भिसलाई एक दर्जनभन्दा बढी पटक फोन गरेको बताए ।
रहमानको पूर्व निवासनजिक बस्ने एक पसलेले अराजकताप्रति चिन्ता व्यक्त गरे । ॅयो तोडफोड राम्रो सङ्केत होइन’ बोलेकोमा प्रतिशोधको डरले नाम नखुलाउन अनुरोध गर्दै उनले भने । (रासस/एएफपी)
