काठमाडौँ । माघ ३० गतेसम्म चल्ने काठमाडौँमा नेपाल–भारत रङ्ग महोत्सव सुरु भएको छ । राष्ट्रिय नाचघर जमलमा सुरु भएको
महोत्सवको २०८१ माघ २३ गते बुधबार साँझ संस्कृति पर्यटन तथा नागरिक उड्डयनमन्त्री बद्रिप्रसाद पाण्डेले उद्घाटन गर्नुभएको हो ।
नेपाल सङ्गीत तथा नाट्य प्रज्ञा–प्रतिष्ठानले राष्ट्रिय नाट्य विद्यालय भारतसँगको सहकार्यमा सो महोत्सव आयोजना गरेको जानकारी दिइएको छ ।
उद्घाटन समारोहमा मन्त्री पाण्डेले दुई देशको सहकार्यमा नाटक महोत्सव आयोजना हुनु खुसीको कुरा भएको भन्दै प्रशंसा गर्नुभयो ।
प्रतिष्ठानकी कुलपति निशा शर्माले यसरी सहकार्यमा महोत्सव गर्दा कलासंस्कृति आदानप्रदान हुने बताउनुभयो ।
महोत्सवको उद्घाटनपछि सिके लालको लेखन तथा सुनिल पोखरेलको निर्देशन रहेको नाटक “गच्छामी” प्रदर्शन गरिएको थियो ।
यही माघ ३० गतेसम्म चल्ने महोत्सवमा छओटा नाटक प्रदर्शन गरिने प्रतिष्ठानकी कुलपति शर्माले जानकारी दिनुभयो । उहाँले जमलस्थित राष्ट्रिय नाचघरको प्रेक्षालयमा प्रदर्शन हुने नाटकमध्ये तीनओटा नेपालका र तीनओटा भारतका प्रदर्शन हुने बताउनुभयो ।
कुलपति शर्माका अनुसार भारतको राजधानी नयादिल्लीमा माघ १५ गते नै यस्तै महोत्सवसुरु भइसकेको र भारतका ११ सहरमा महोत्सव जारी छ ।
महोत्सवअन्तर्गत बिहीबार नयनराज पाण्डेको लेखन र दिया मास्केको निर्देशन रहेको नाटक “कथा कस्तुरी” तथा माघ २७ गते संयोग गुरागाईंको लेखन तथा नम्रता केसीको निर्देशन रहेको नाटक “जुन परीकथा मात्र होइन” प्रदर्शन भएको छ ।
महोत्सवअन्तर्गत माघ २८ गते विजयदन देथाको लेखन तथा अजय कुमारको निर्देशन रहेको भारतीय नाटक “माई री मैं का से कहूँ”, माघ २९ गते मिथिलेश्वरको लेखन तथा राजेश सिंहको निर्देशन रहेको भारतीय नाटक “बाबुजी” प्रदर्शन हुनेछ ।
माघ ३० गते अजय शुक्लको लेखन र चित्तरञ्जन त्रिपाठीको निर्देशन रहेको भारतीय नाटक “ताजमहल का टेन्डर” प्रदर्शन हुने जनाइएको छ ।
यहाँ प्रदर्शन हुने नेपाली नाटकमध्ये “गच्छामी” र “कथा कस्तुरी” काठमाडौँमा प्रदर्शन भइसकेपछि नयाँदिल्लीमा प्रदर्शन हुनेछन् भने “जुन परीकथा मात्र होइन” भारतको गोरखपुरमा प्रदर्शन भएपछि काठमाडौँमा प्रदर्शन हुनेछ । (रासस)
