काठमाडौँ । प्रगतिशील लेखक सङ्घको चैत्र २३ र २४ गते हुने राष्ट्रिय सम्मेलनलाई लक्षित गरेर प्रलेस गण्डकीले आफ्ना गतिविधिहरूलाई तीव्रता दिइरहेको छ ।
प्रलेस गण्डकीले आफ्ना गतिविधिहरूलाई तीव्रता दिँदै जिल्ला तथा प्रदेश अधिवेशनलाई सम्पन्न गरिरहेको छ । प्राप्त जानकारी अनुसार गण्डकी प्रदेश अन्तरगत स्याङ्जा र नवलपुरको जिल्ला सम्मेलन माघ १२ गते सम्पन्न भइसकेको छ । ती जिल्लाहरूमा क्रमशः अनन्त अर्याल र काशीराम गैरेलाई जिल्ला अध्यक्ष चयन गरिएको प्रदेश अध्यक्ष यादव उपाध्यायले जानकारी गराउनुभएको छ । गण्डकी प्रदेश अन्तरगत गोरखा जिल्लामा माघ २५गते, कास्की, लमजुङ, पर्वत र म्याग्दीमा माघ २६ तथा तनहुँमा फागुन ३ गते जिल्ला सम्मेलन गर्न लागिएको पनि अध्यक्ष यादवले बताउनुभयो ।
फागुन १६ गते पोखरामा प्रदेश अधिवेशन हुने र सो अधिवेशनमा ५०० पृष्ठको गण्डक आलोक भाग २ प्रकाशन गर्न लागिएको छ । सो गण्डक आलोक निबन्ध विशेषाङ्क, समालोचना र दर्शनसम्बन्धी हुने जानकारी हुन आएको छ । प्रदेश अधिवेशनकै सन्दर्भमा प्रलेस गण्डकीको अक्षयकोषमा एक जना उत्कृष्ट सृष्टालाई गण्डक साहित्य पुरस्कारबाट सम्मानित गरिने पनि अध्यक्ष यादवले बनाउनुभयो ।
प्रलेसका राष्ट्रिय अधिवेशनलाई लक्षित गरेर गण्डकी प्रदेशमा भइरहेका प्रलेसका गतिविधिहरूबाट प्रगतिशील सृष्टाहरुमा थप ऊर्जा थपिँदै गएको त्यसका साथै सामन्तवाद तथा साम्राज्यवादी प्रभावका विरुद्ध एकताबद्ध भएर क्रियाशील हुने संस्कृतिको विकास हुँदै गएको प्रलेस, गण्डकी प्रदेशका इन्चार्ज समीर सिंहले युगदर्शनलाई बताउनु भयो ।
