काठमाडौँ । प्रगतिशील लेखक सङ्घ लुम्बिनी प्रदेश समितिको तेस्रो सम्मेलन आगामी फागुन २६ गते दाङको लमहीमा हुने भएको छ ।
केन्द्रीय सचिव तथा प्रदेश इन्चार्ज डिबी गुरुङको प्रमुख आतिथ्यमा २०८१ माघ १२ गते सम्पन्न प्रदेश समितिको बैठकले सो निर्णय गरेको हो ।
प्रदेश समितिका सदस्य जगदीश ढकालका अनुसार बैठकले सम्मेलनको उद्घाटन केन्द्रीय अध्यक्ष प्राडा मधुसूदन गिरीले गर्ने निर्णय भएको छ ।
प्रदेश समितिका अध्यक्ष पङ्कजकुमार श्रेष्ठको अध्यक्षता लमहीमा सम्पन्न सो बैठकले सम्मेलनमा प्रत्येक जिल्लाबाट एक महिलासहित तीन जना प्रतिनिधि आउनुपर्ने, साथै ३३ प्रतिशत महिला अनिवार्य हुने गरी १० जना साधारण सदस्य बराबर एक थप प्रतिनिधि उपस्थिति आउने निर्णय गरिएको उहाँले जानकारी दिनुभयो ।
त्यस्तै, सम्मेलनमा साङ्गठनिक प्रतिवेदन अध्यक्षले र आर्थिक प्रतिवेदन कोषाध्यक्षले प्रस्तुत गर्ने निर्णय बैठकबाट गरिएको छ ।
सम्मेलन सम्पन्न पार्न जगदीश ढकालको संयोजकत्वमा प्रचारप्रसार समिति, शशिराम कार्कीको संयोजकत्वमा आर्थिक समिति, निमबहादुर थापाको संयोजकत्वमा भोजन व्यवस्थापन समिति र पद्मप्रसाद शर्माको संयोजकत्वमा सम्मेलन कक्ष व्यवस्थापन समिति गठन गरिएको ढकालले जानकारी दिनुभयो ।
