काठमाडौँ । ‘कामरेड जलजला’ उपन्यासबारे लेखक मोहनविक्रम सिंह र अर्का लेखक प्रदीप ज्ञवालीमाझ संवाद हुने भएको छ ।
सेतो पाटी डट कम अनलाइन न्युज पोर्टलले सो संवादको आयोजना गरेको हो ।
उक्त संवाद २०८१ माघ ५ गते शनिबार दिउसो ३ बजे हुने छ ।
प्रगतिवादी लेखक सिंहका सो कार्यक्रममा ‘जलजला’ उपन्यासको बारेमा दुई लेखकमाझ साहित्यिक संवाद हुने छ ।
प्रगतिवादी साहित्यकार ज्ञवालीले केही दिनअघि आफूले माघ २ गते आफूले सो उपन्यासबारे सामाजिक सञ्जालमा स्टाटस राख्नुभएको थियो ।
‘कामरेड जलजला’ उपन्यासलाई ‘पर्वतकाय’ उपन्यासको सङ्ज्ञा दिँदै ज्ञवालीले लेख्नुभएको थियो– ‘कामरेड मोहनविक्रम सिंहको २३ वर्ष लामो साधनाको परिणति । १३,२० पेजको यो पर्वत चढ्न धैर्य चाहिन्छ तर शिखरमा पुगेपछि चाहिँ सूचना, ज्ञान र परिकल्पनाको विशाल क्षितिजसँग साक्षात्कार हुन्छ, जसमा सबैथोक छन्– दर्शन, इतिहास, संस्कृति, विचार, राजनीति, भूगोल, खगोल, मिथ, समाज, प्रेम, संयोग र वियोग ।’
उहाँले उमेरजन्य बाधा पञ्छाउँदै यस तहको कृति निर्माण गर्न सक्नुभएकोमा प्रगतिवादी लेखक सिंहलाई हार्दिक बधाई दिनुभएको थियो ।
