काठमाडौँ । एक सय बत्तिसौँ माओ जन्मजयन्तीको अवसरमा अखिल नेपाल प्रगतिशील लेखक सङ्घ (अन्पा) ले कविता वाचन कार्यक्रम सम्पन्न गरेको छ ।
नेकपा (मसाल) का केन्द्रीय प्रवक्ता रामप्रकाश पुरीको प्रमुख आतिथ्यमा २०८१ पुस ११ गते (डिसेम्बर २६) का दिन भर्चुअल माध्यमबाट सो कार्यक्रम सम्पन्न गरेको हो ।
कार्यक्रमको पूर्वार्द्धमा माओत्सेतुङसित सम्बन्धित रहेर रवि पौडेल, रामप्रसाद गैरे, जनक बिसी, प्रकाश थापामगर, हितेष पौडेल, इन्दिरा गौतम, समष्टि बुढा, कल्पना पौडेल, रामदेव पाण्डे र समीर सिंहले कविता तथा हेमराज आश्रमले गीत प्रस्तुत गर्नुभएको थियो ।
येनान गोष्ठीको विचार कोशेढुङ्गा साबित : पुरी
कविताको सङ्क्षिप्त समालोचना तथा मन्तव्य राख्दै प्रमुख अतिथि पुरीले माओले येनान गोष्ठीमा व्यक्त गर्नुभएको विचार कोशेढुङ्गा सावित भएको बताउनुभयो ।
‘माओत्सेतुङले येनान गोष्ठीमा व्यक्त गर्नुभएको विचार कोशेढुङ्गा सावित भएको छ’ उहाँले भन्नुभयो– ॅत्यो विचार चीनका लागि मात्रै होइन, विश्वभरिका प्रगतिवादी साहित्यका लागि कोशेढुङ्गा सावित भएको हो ।’
उहाँले सर्वहारा क्रान्तिको अधिनस्त रहेर साहित्य रचना गर्नुपर्ने माओको शिक्षालाई आत्मसात गर्नुपर्ने आवश्यकतामा जोड दिनुभयो ।
मन्तव्यको क्रममा उहाँले माओत्सेतुङले येनान गोष्ठीमार्फत् पार्टी र जनताको सम्बन्ध प्रगाढ गर्ने गरी साहित्य लेख्नुपर्ने, साहित्यमा जनताका लागि बोधगम्य हुनुपर्ने, साहित्यमा वर्गीय पक्षधरता व्यक्त हुनुपर्ने, राजनीति र सौन्दर्यशास्त्रमाझ सम्बन्ध हुनुपर्ने, जनताको आवाज साहित्यमा प्रतिबिम्बित हुनुपर्ने, विचार र कलालाई संयोजन गर्नुपर्ने जस्ता विषय प्रस्तुत गरेको स्पष्ट पार्नुभयो ।
कार्यक्रमको अध्यक्ष अन्पाका अध्यक्ष समीर सिंहले तथा सञ्चालन उपाध्यक्ष रामदेव पाण्डेले गर्नुभएको थियो ।
