ढोरपाटन (बागलुङ) । बागलुङका ग्रामीण सडक सञ्चालनमा नआउँदा स्थानीयलाई सास्ती भएको छ ।
वर्षाका कारण गत असारदेखि अवरुद्ध भएका सडक दशैँमा पनि सञ्चालन नहुँदा सामान ढुवानी तथा यात्रा गर्न समस्या भएको हो ।
जिल्लाको तमानखोला, निसीखोला, काठेखोला, बडिगाड गाउँपालिकासहित १० ओटै पालिकाका ग्रामीण सडक पूर्ण रूपमा सञ्चालनमा आउन सकेका छैनन् ।
दशैँअगावै सबै सडक सञ्चालन गर्ने भनिए पनि अविरल वर्षाका कारण खुलाउन नसकिएको निसीखोला गाउँपालिकाका अध्यक्ष सूर्यबहादुर घर्तीले बताउनुभयो । यहाँका मुख्य मुख्य सडक सञ्चालन भए पनि केही सडक चाँडै खुलाउने तयारी भइरहेको उहाँले जानकारी दिनुभयो ।
अध्यक्ष घर्ती भन्नुहुन्छ– ॅगाउँपालिकाभित्रका सबै सडक दशैँमा सञ्चालन गर्ने योजना थियो तर अविरल वर्षाका कारण केही सडक खुलाउन सकिएन । अब केही दिनमा सञ्चालन हुने गरी काम गर्छौं ।’
बडिगाड गाउँपालिकाकी अध्यक्ष गण्डकी थापा अधिकारीले दशैँअघिको वर्षाले बडिगाडमा ठुलो क्षति पुर्याएको हुँदा वडा ९ र १० का विभिन्न स्थानका सडक सञ्चालन गर्न नसकिएको बताउनुभयो । पालिकाले वर्षाका कारण अवरुद्ध सडक खुलाउनका लागि रु ६० लाख विनियोजन गरे पनि त्यसले केही ठाउँका सडक मात्र सञ्चालनमा गर्न सकिएको उहाँले बताउनुभयो । गाउँपालिकाभित्र रहेका दर्लिङ, नयाँगाउँ, मालारानी, आरुपाटा, निगलपानी पुग्ने सडक पूर्ण रूपमा ठप्प भएको अध्यक्ष अधिकारीको भनाइ छ ।
दशैँमा गाउँमा मोटरबाटो सञ्चालन नहुँदा बोकेरै सामान ढुवानी गर्नुपरेको स्थानीय चन्द्रकान्त बुढामगरले गुनासो गर्नुभयो । साउन महिनामा पहिरोले सडकको र्ट्याक नै बगाएपछि यातायातका साधान चल्न छोडेको भन्दै दशैँमा टाढाटाढाबाट आउने आफन्तहरुले सास्ती खेप्नुपरेको उहाँको भनाइ छ ।
ॅसाउनदेखि नै समस्या थियो तर दशैँमा त समस्या समाधान होला सोचेका थियौँ । यही बेला वर्षाले धेरै ठाउँमा पहिरो गएर थप समस्या भयो । सडक नखुल्दा दशैँसमेत खल्लो हुनुपुग्यो’ बुढामगरले भन्नुभयो । (रासस)
