दिनेश रैदास, दाङ ।
राष्ट्रिय जनमोर्चाका कार्यकारी अध्यक्ष रश्मिराज नेपालीले चाडपर्वको नाममा हुने विकृतिलाइ रोक्नुपर्ने आवश्यकता औल्याउनुभएको छ ।
राजमो गढवा गाउँपालिका समितिले २०८१ असोज २० गते आइतबार आयोजना गरेको चाडपर्व मिलन तथा शुभकामना आदानप्रदान कार्यक्रमलाई सम्बोधन गर्दै उहाँले यस्तो आवश्यकता औल्याउनुभएको हो ।
‘चाडपर्वको नाममा महङ्गो खानुपर्ने, महङ्गो लगाउनुपर्ने, तडकभडक गर्नुपर्ने, जाँडरक्सी र जुवातासलाई बढावा दिनुपर्ने जस्ता विकृत संस्कृतिलाइ निरुत्साहित गर्नुपर्दछ’ उहाँले भन्नुभयो ।
अध्यक्ष नेपालीले देशमा युवाहरूको विदेश पलायनप्रति चिन्ता प्रकट गर्दै उनीहरूमा देशभक्ति भावना वृद्धि गर्नुपर्ने कुरा बताउनुभयो ।
कार्यक्रमलाई सम्बोधन गर्दै राजमो केन्द्रीय सदस्य तथा दाङ जिल्ला अध्यक्ष गणेश आचार्यले हाम्रो देश धर्मनिरपेक्ष भएको हुनाले सबै चाडपर्व र धर्मसंस्कृतिलाई समान रूपले लिनुपर्ने बताउनुभयो ।
कार्यक्रममा अखिल नेपाल युवक सङ्घका पूर्व केन्द्रीय अध्यक्ष काशिनाथ पोख्रेल, अखिल नेपाल किसान महासङ्घ (अप्फा) का केन्द्रीय कोषाध्यक्ष प्रेमनारायण आचार्य, राजमो जिल्ला सदस्य दिनामणि आचार्य, अखिल नेपाल शिक्षक सङ्घका केन्द्रीय सदस्य लालबहादुर भण्डारी, अखिल नेपाल महिला सङ्घ दाङकी अध्यक्ष पूर्णिमा आचार्य, राजमो जिल्ला सल्लाहकार गुणनिधि शर्मा, शिक्षक सङ्घ जिल्ला सचिव ठाकुर खनाल, अखिल नेपाल राष्ट्रिय उद्योग ब्यापार सङ्घका जिल्ला सदस्य चिन्ताप्रसाद पोख्रेल, अखिल नेपाल बुद्धिजीवी सङ्घका जिल्ला अध्यक्ष चुनचुन केसी, अखिल (छैठौं) का जिल्ला सदस्य संस्कृति आचार्य, गढवा कार्यपालिका सदस्य सूर्य नेपालीलगायतले मन्तव्य राख्नुभएको थियो ।
सो अवसरमा ज्येष्ठ सदस्यहरू रुक्मागत आचार्य, ईश्वरी आचार्य, तिलकराम पोख्रेल, काशिराम यादव, धर्मराज पन्थी, धनेश्वर खनाल, पूर्ण छात्रवृत्तिमा एमबिबिएस अध्ययनमा नाम निकाल्नुभएका दिग्सन आचार्य, सुदिन भुसाल र असीम पोख्रेललाई दोसल्ला र अबिर लगाई सम्मान गरिएको थियो ।
सम्मानितमध्येबाट आचार्य, भुसाल र पोख्रेलले सम्मान गरेकोमा खुसी प्रकट गर्दै धन्यवाद ज्ञापन गरेका थिए ।
राजमो अध्यक्ष कपिलदेव खनालको अध्यक्षतामा अगाडि बढेको सो कार्यक्रममा स्वागत मन्तव्य कृष्ण खडकाले तथा सञ्चालन चित्र एमसीले गर्नुभएको थियो ।
