काठमाडौँ । राष्ट्रिय जनमोर्चाले तीन दिनदेखिको अविरल वर्षाका कारण बाढीपहिरो आउँदा ज्यान गुमाएका मृतकप्रति श्रद्धाञ्जली व्यक्त गर्दै तत्कालै उद्धार र राहतमा ध्यान दिन सरकारसित माग गरेको छ ।
उपाध्यक्ष तथा प्रवक्ता दुर्गा पौडेलको हस्ताक्षरमा २०८१ असोज १२ गते शनिबार प्रेसवक्तव्य जारी गर्दै राजमोले यस्तो माग गरेको हो ।
वक्तव्यमा बेपत्ताको खोजी, घाइतेको उपचार गर्न सरकार र प्रशासनसित माग गर्दै जलवायु परिवर्तनको विषयमा पनि गम्भीर हुन सम्बन्धित सबै पक्षसित आग्रहसमेत गरेको छ ।
यस्तो छ, प्रेसवक्तव्यको पूर्ण पाठ :
“बिहीबार साँझदेखि परेको अविरल वर्षाका कारण देशैभरि जनधनको क्षति भएको छ । त्यस क्रममा राजधानीमा नै ३४ जना तथा देशैभरि ६६ जनाको मृत्यु भएको तथा दर्जनौँ व्यक्तिहरू अझै बेपत्ता भएको सञ्चारमाध्यमले बताएका छन् । त्यसैगरी देशैभरि बाढीपहिरो र डुबानको अवस्था छ । खोलानाला र नदीको जलसतह बढेका छन् । बाढीपहिरोले घर भत्किनुका साथै देशैभरि सडक सञ्जाल अवरुद्ध भएको छ । अझै पनि कैयौँ स्थानमा तीव्र उद्धारको आवश्यकता छ ।
राष्ट्रिय जनमोर्चा अविरल वर्षाका कारण ज्यान गुमाउने सम्पूर्ण मृतकप्रति श्रद्धाञ्जली तथा शोकसन्तप्त परिवारप्रति समवेदना व्यक्त गर्दछ । बेपत्ता भएका व्यक्तिहरूको तत्काल खोजी तथा घाइतेको शीघ्र उपचारका लागि सम्बन्धित जिल्लाका प्रशासनले ध्यान दिनुपर्ने आवश्यकतामा जोड दिन्छ । त्यसका साथै राहत तथा उद्धारको कार्यमा तीव्रता दिन सरकार तथा प्रशासनसित माग गर्दछ ।
नेपालका लागि असोजको महिना सामान्यतः वर्षाको समाप्त भएको समय मानिन्छ तर अहिलेसम्म पनि मनसुन यथावत् छ । मनसुनको अन्ततिर आइपरेको यस्तो प्राकृतिक बिपत् विश्वमा बिग्रँदै गएको जलवायु परिवर्तनको कारणले हुन गएको मान्न सकिन्छ । त्यसकारण जलवायु परिवर्तनको पक्षमा गम्भीर हुन सम्बन्धित सबै पक्षसित हामी अनुरोध गर्दछौँ ।”
