काठमाडौं । पूर्व प्रधानमन्त्री डा. बाबुराम भट्टराईले भारतले नेपालीमाथि गरिएको दुर्व्यवहार सम्बन्धी भिडियो सेयर गर्दै नेपालीको राष्ट्रिय स्वाभिमान र स्वाधिनता यही हो भनि प्रश्न गर्नुभएको छ ।
प्रधानमन्त्री केपी शर्मा ओलीलाई मेन्सन गर्दै डा. भट्टराईले सामाजिक सञ्जाल ट्विटमार्फत ‘नेतृत्वमा बस्ने र लड्ने अधिकार नभएको’ बताउनुभएको छ ।
भट्टराई लेख्नुहुन्छः ‘देशले रोजगारी दिन नसकेर विदेश जान बाध्य यी नेपाली नागरिकहरूले भोग्नु परेको सास्ती र अपमान प्रधानमन्त्री केपी ओली लगायत हामी सबैले हेरौं, सुनौं र आफ्नै ब्रह्मसँग सोधौं– यही हो हाम्रो राष्ट्रिय स्वाधीनता र स्वाभिमान ? अझै पनि हामीलाई यो देशको नेतृत्वको कुर्सीमा बस्ने र लड्ने नैतिक अधिकार रहन्छ ?
भट्टराईले रामेश कोइरालाको ट्विट सेयर गर्दै सो प्रश्न गर्नुभएको हो ।
देशले रोजगारी दिन नसकेर विदेश जान बाध्य यी नेपाली नागरिकहरूले भोग्नु परेको सास्ती र अपमान @kpsharmaoli लगायत हामी सबैले हेरौं/सुनौं र आफ्नै ब्रह्मसंग सोधौं- यही हो हाम्रो राष्ट्रिय स्वाधीनता र स्वाभिमान?अझै पनि हामीलाई यो देशको नेतृत्वको कुर्सीमा बस्ने र लड्ने नैतिक अधिकार रहन्छ? https://t.co/OxWLLSGQMO
— Baburam Bhattarai (@brb1954) May 8, 2020
रामेशले भारतको हल्द्वानीको क्वारेन्टिनबाट १७ नेपालीलाई अपमानित ढंगले निकालिएको भिडियो सेयर गर्नुभएको छ ।
उहाँले लेख्नुभएको छः ‘भारत सरकारले तिमेरूलाई पक्रेर काम गर्न जबरजस्ति ल्याको हो ? पैसा कमाउन आयौ त हाम्रो के गल्ती ? नेपालीलाई फोकटमा ख्वाउन भारतसँग पैसा छ ? बाहिर भेटे जेल जान्छौ, सिमामा जान पाउँदैनौ ! सरकार, दियो बालेर फुर्सद भएपछि होटलमा मस्तले राखिएका यी नेपालीलाई इज्जत गरिएका यी कुरा पनि सुन्नु है !’
