फाइल फोटो

काठमाडौं । भारतको उत्तराखण्डको हल्द्वानीमा रहेको क्वारेन्टिनबाट १७ जना नेपालीलाई अपमानित ढंगले निकालिएको छ । भारतको उत्तराखण्डको हल्द्वानीस्थित क्वारेन्टिनमा रहेका १७ जना नेपाली मजदुरलाई भारतीय अधिकारीहरुले निकालेका हुन् ।

नेपालीहरुलाई पनकाल्ने क्रमममा उनीहरुले प्रतिवाद गर्न खोजेको सामाजिक सञ्जालमा राखिएको एउटा भिडियोमा देखिन्छ । सीमा बन्द भएका कारण घर फर्किन पनि नपाउने र भोकै मर्ने अवस्था आउने नेपालीले बताएका छन् ।
‘जहाँ गएपनि मर्ने नै हो भने, हामीलाई यहीँ मर्न दिनुस, यही मारिदिनुस्’, एक नेपाली भन्छन्, ‘तर, हामीलाई यहाँबाट जाउ नभन्नुस् ।’

जवाफमा भारतीय महिलाले १५/२० दिन राखेर खान बस्न दिएको उल्लेख गर्दै अब नसकिने बताउँछिन् । भिडिओमा देखिएका भारतीय सुरक्षाकर्मीले पनि महिलाको कुरामा समर्थन जनाएका छन् ।

‘दुई बजेपछि हमी यहाँको गेटबाट बाहिर छाडिदिन्छौँ, यसको मतलब यो होइन कि हामी वनबासासम्म छोडिन्दिछौँ’, उनी भन्छन्।

नेपालीहरुलाई खान बस्न दिन नसकिने ति महिलाले कठोरतापूर्वक बताएकी छन् । ‘तिमीहरूलाई यहाँ भारत सरकारले डोली चढाएर, पक्राउ गरेर ल्याएको त होइन नि। तिमीहरू पैसा कमाउन आएका हौ। पैसा कमाउन आएकालाई निःशुल्क खान, बस्न दिन सक्दैनौँ । तिमीहरू यहाँबाट जानु आवश्यक छ’ उनी भन्छिन् ।

क्वारेन्टिनबाट निकाल्ने भए सिमानाकासम्म पुर्‍याइदिन नेपालीहरूले माग गर्छन् । ‘यहाँ बस्न पनि नदिने, काम गर्न पनि नदिने हो सीमासम्म पुर्‍याइदेऊ’, एक नेपाली भन्छन् । तर, जवाफ ती भारतीय महिलालई सामासम्म पुर्‍याउन नसक्ने बताउँछिन् । सीमामा भीड गराउन नसक्ने उनको भनाई छ । त्यसपछि बाहिर जथाभावी घुमे आजीवन जेल हाल्ने उनले चेतावनी दिएकी छन् ।

पलियामा पनि अपमान
यता कैलालीसँग सीमा जोडिएको उत्तरप्रदेश स्थित पलियामा रहेको क्वारेन्टिनमा रहेका २०० नेपालीहरुमाथि पनि अपमान भएको खबर प्राप्त भएको छ ।

क्वारेन्टिनमा रहेका नेपालीले युगदर्शनलाई दिएको जानकारी अनुसार धार्चुलाको क्वारेन्टिनबाट नेपालीलाई देशभित्र आउन दिएकै दिन  अथात  वैशाख १८ गतेउनीहरुलाई पनि गाडीमा हालेर ३५ किलोमिटर वरको गौरिफन्टा नाकामा ल्याइएको थियो । तर नेपाल आउने अनुमति नपाएपछि उनीहरुलाई फेरि फर्काएर त्यहीँ लगियो ।

त्यस यता नेपालीले एक छाक मात्रै खाना खान पाएका छन् ।  कैलालीको गोदावरी नगरपालिका–९ का जयबहाुर थापाले एक हप्तादेखि आफूहरुले दिनको एक छाक मात्रै खान पाएको भन्दै तत्काल उद्धार गरी नेपाल ल्याउन सरकारसँग आग्रह गर्नुभयो ।

यस्तै, डडेल्धुराको स्याउलेका भुपेन्द्र अधिकारीले सुदूरपश्चिम प्रदेशका मुख्यमन्त्री त्रिलोचन भट्टलाई टेलिफोनमा आफ्ना समस्या जानकारी गराउँदा पनि वास्ता नगरिएको गुनासो गर्नुभयो । नेपालीहरुले भारतमा आफूहरु अपमानित भएर बस्नुभन्दा मर्नुपरे पनि आफ्नै देशमा आएर मर्ने बताएका छन् ।