खुम रायमाझी, कुवेत ।
कुवेतस्थित नेपाली दूतावासले विभिन्न कारणले पीडित भई दूतावासको शरणमा आएका ३६९ जना घरेलु कामदारको उद्धारको सम्पूर्ण प्रकृया पूरा गरेर नेपाल पठाएको जनाएको छ ।
राजदुत घनश्याम लम्सालले अगसत १६, २०२४ का दिन सो जानकारी दिनुभएको हो ।
सोही अवधिमा दूतावासबाहिर बसेका अन्य ३९० जना घरेलु कामदारलाइ दूतावासको समन्वय र सहजीकरणमा कानुनी प्रकृया पूरा नेपाल पठाउने व्यवस्था गरिएको राजदूत लम्सालले बताउनुभयो ।
राजदूत घनश्याम लम्सालले कार्यभार सम्हालेउप्रान्तको तथ्याङ्क हो ।
राजदूत लम्सालका अनुसार यस अवधिमा ८७ हजार मागपत्र प्रमाणित गरिएको, ३१ हजार विभिन्न कागजात (भिसा प्रमाणीकरणबाहेक) प्रमाणित गरिएको, १३ हजार चार सय ७८ राहदानी नवीकरण गरी जारी गरिएको, तीन हजार सात सय ९८ ट्राभल डकुमेन्ट (आममाफीमा जारी गरिएका तीन हजार दुई सयसहित) जारी गरिएको, विभिन्न केशका ६७ जनाको क्षतिपूर्ति रकम एक लाख ८५ हजार कुवेती दिनार नेपाल पठाइएको, ३७ करोड रूपैयाँ राजस्व सङ्कलन भएको छ ।
अहिले पनि ५१ जना नेपाली विभिन्न मुद्दामा अदालतको निर्णयबमोजिम कुवेतका जेलमा सजाय भोगिरहेका जानकारी दिइएको छ ।
जेलमा रहेकाहरूमा ४१ जना लागुपदार्थ ओसारपसारमा, चार जना मादक पदार्थको किनबेचमा, दुई जना हत्या अपराधमा सजाय पाएकाहरू छन् ।
त्यस्तै, यस अवधिमा कुवेत र इराकमा गरी ६३ जना नेपालीको ज्यान गएको छ । त्यसमध्ये जसमा कुवेतमा मात्रै ५८ जनाको मृत्यु भएको छ भने सबै मृतकहरूको पार्थिव शरीर नेपाल पठाइसकिएको, १६ जनालाई अस्पतालबाट उद्धार गरी नेपाल पठाइएको र चार जना अझै पनि अस्पतालका शैयामा रहेको जानकारी दिइएको छ ।
नेपाली राजदूतावास कुवेतले आयोजना गरेको राजनीतिक दलका भ्रातृ सङ्गठन, एनआरएनए कुवेत र नेपाल पत्रकार महासङ्घसँगको सामूहिक छलफलपछि बोल्दै राजदूत लम्सालले सो तथ्याङ्क सार्वजनिक गर्नुभएको हो ।
