काठमाडौं । काठमाडौंमा लामो समयसम्म कोरोना संक्रमित नभेटिएपछि जारी लकडाउन उपत्यकामा खुकुलो बनाउनुपर्ने चर्चा चलिरहेको छ । सरकारले वैशाख २५ गते पछि सामाजिक दूरी कायम गरी उद्योग धन्दा सञ्चालन गर्ने  विद्यालयमा विद्यार्थी भर्ना सुरु गर्न आग्रह गरिएको छ ।

यसको अर्थ लकडाउन अब खुकुलो हुनेछ भन्ने नै हो ।

तर, आइतबार एकाएक नेपालगन्जमा ठुलो संख्यामा कोरोना संक्रमित देखिएपछि यसले देशब्यापी त्रास सिर्जना गरेको छ । लकडाउन खुकुलो होला र जनजीवन सामान्य बन्ला भनेर अपेक्षा गरेका नागरिक फेरि चिन्तित बनेका छन् ।

नेपालगन्जमा एकैदिन १५ जनामा कोरोना संक्रमण देखिएपछि देशभरको लकडाउनमा कडाइ गरिएको छ । थप जोखिम नबढोस् भनेर लकडाउन कडाइ गरिएको प्रहरीले जनाएको छ ।

नेपाल प्रहरीका प्रहरी प्रवक्ता (डीआईजी) नीरज शाहीका अनुसार देशभर लकडाउन कडा पारिनेछ । एक जिल्लाबाट अर्को जिल्लामा आवागमन र काठमाडौं उपत्यका प्रवेशमासमेत कडाइ गरिनेछ ।

अहिलेसम्म काठमाडौं उपत्यका तुलनात्मक रुपमा सुरक्षित देखिएपनि लकडाउन खुकुलो भएमा संक्रमण फैलनसक्ने प्रहरीको बुझाई छ ।

आइतबार बाँकेको नेपालगञ्जमा १५ र पर्सा बिरगञ्जमा १ गरी एकै दिन १६ जना संक्रमित भेटिएका थिए ।

नेपालगन्जमा एकै पटक धेरै संक्रमित भेटिनुको कारण
नेपालगन्जमा एकै दिन कोरोनाभाइरसका १५ जना नयाँ संक्रमित भेटिएपछि अचानक कसरी संक्रमितको संख्या बढ्यो भन्ने प्रश्न जन्मिएको छ।

स्वास्थ्य अधिकारीहरूले संक्रमितहरू थाहा पाएर वा नपाएर लुकेर बसेको र संक्रमितमा हालसम्म लक्षण पनि नदेखिएकाले पहिचान गर्न मुस्किल भएको अनुभव सुनाएका छन् ।

भेरी अस्पताल नेपालगन्जका प्रमुख ड. प्रकाश थापाका अनुसार शंकाको आधारमा परीक्षणको दायरा बढाउँदै जाँदा पछिल्ला संक्रमित फेला परेका हुन् । बाँकेमा नमुना परीक्षण गर्न ढिलो हुँदा एक्कासि धेरै संक्रमित देखिएका डा. थापाको भनाई छ ।

लकडाउन थप्ने तयारी
कोरोना संक्रमण बढेसँगै लकडाउन बढ्ने भएकोे छ । गत चैत ११ देखि देखि सुरु भएको देशब्यापी लकडाउन चौथोपटक थपेर वैशाख २५ सम्म पुर्र्याइएको छ ।
कोरोना भाइरस संक्रमणको जोखिम उच्च रहेको भन्दै सरकारले फेरि १५ दिन लकडाउन थप्ने तयारी गरेको छ।

मन्त्रिपरिषदको आइतबारको बैठकमा पछिल्लो समय नेपालमा कोरोना संक्रमित बढ्दै गएको र छिमेकी मुलुक भारतमा पनि संक्रमण दर बढिरहेकाले जोखिम कायमै हुँदा लकडाउन थप १५ दिन बढाउनु पर्ने विषयमा छलफल भएको थियो ।

भारतले लकडाउनलाई निरन्तरता दिइरहेका बेला खुला सीमा भएको नेपालमा लकडाउन हटाउँदा स्थिति जुनसुकै बेला पनि भयावह हुनसक्ने भन्दै जेठ १० सम्म बढाउने सहमति भएको स्रोतले जनाएको छ ।

नेपालगञ्जमा संक्रमितको संख्या अचानक बढेपछि सरकार थप सतर्क अवस्थामा पुगेको छ । नेपालमा आइतबारसम्म ७५ जना संक्रमित भएका छन् । जसमा १६ जना उपचारपछि घर फर्किएका छन् ।