खुम रायमाझी, कुवेत ।
कुवेत र नेपालमाझ सिधा व्यापारिक सम्बन्ध विस्तार गर्नको लागि पहल भइरहेको छ ।
यस क्रममा कुवेतस्थित नेपाली राजदूतावासको आयोजनामा “निर्यात प्रवर्द्धन र नेपालमा लगानीको अवसर” सम्बन्धी अन्तर्क्रिया कार्यक्रम सम्पन्न भएको हो ।
कुवेतस्थित फरवानियाँको क्राउन प्लाजा होटलमा जुलाई ३, २०२४ का दिन कुवेतका प्रमुख व्यवसायी, लगानीकर्ता र सञ्चारकर्मीबिच सो कार्यक्रम सम्पन्न भएको हो ।
कार्यक्रममा राजदूत घनश्याम लम्सालले दुई देशबिचको व्यापारिक सम्बन्ध विस्तार गर्न प्रयास जारी रहेको बताए । नेपालमा लगानीका आकर्षक क्षेत्रहरू ऊर्जा, व्यापार, पर्यटन, कृषि लगायतमा लगानी गर्न आग्रह गर्दै काठमाडौँमा गत अप्रिलमा सम्पन्न तेस्रो नेपाल लगानी सम्मेलनको उपलब्धिलाई प्रकाश पार्दै लगानीकर्तालाई अर्को लगानी गन्तव्यका रूपमा नेपाल छनोट गर्न राजदूतले आग्रह गरे ।
नेपालका अलैँची, चिया, कफी, अदुवा, पस्मिना सल, हेड स्कार्फ, सुती कपडा, गलैँचा, हस्तकला जस्ता प्रमुख नेपाली उत्पादनहरू कुवेत निकासीमा जोड दिने उनल बताए ।
‘नेपालबाट उत्पादन भएका चिज भारत र पाकिस्तान हुँदै तेस्रो मुलुकमा निर्यात भएको छ’ उनले भने– ‘तर ती उत्पादनमा हाम्रो देशमा बनेको वा उत्पादन गरिएको भन्ने कुरा उल्लेख गरिएको हुँदैन । जुन देशले निर्यात गर्छ, त्यही देशमा सामान उत्पादन भएको भनेर उल्लेख गरिन्छ ।’
उनले सिधा व्यापारका लागि कुवेतमा रहेका नेपाली समाजको पनि साथ र सहयोगको आवश्यकता रहेको बताए ।
त्यस्तै, काउन्सिलर सुजनी राणाले कुवेतको हालको लगानीलाई उजागर गर्दै नेपालमा हाइड्रोपावर, यातायात पूर्वाधार, सूचना तथा सञ्चार तथा प्रविधि, खानी तथा खनिज, उत्पादन, स्वास्थ्य र शिक्षा जस्ता विभिन्न क्षेत्रमा लगानीको सम्भावना रहेको बताएकी थिइन ।
कार्यक्रमको सञ्चालन दूतावासका प्रथम सचिव प्रेमराज गौतमले गरेका थिए ।
कार्यक्रममा कुवेत फन्ड फर अरब इकोनोमिक डेभलपमेन्टका प्रतिनिधि, कुवेतका प्रमुख व्यापारिक कम्पनीका प्रतिनिधि तथा सम्भावित लगानीकर्ता, स्थानीय पत्रकार, व्यापार तथा व्यवसायी समुदायका सदस्य, एनआरएन, पत्रकार महासङ्घलगायत ४५ भन्दा बढीको सहभागिता रहेको थियो ।
