काठमाडौं । कोभिड १९ संक्रमण, रोकथाम तथा नियन्त्रण उच्चस्तरीय समन्वय समितिअन्तर्गत मुख्य सचिवको नेतृत्वमा रहेको कार्यदलले लकडाउन एक हप्ता बढाउन सिफारिस गरेको छ । तर, कोरोना संक्रमणको अवस्था र स्थान हेरी केही खुकुलो बनाउन सकिने कार्यदलको सिफारिस छ ।
लकडाउनको स्वरुप तयार गर्न मुख्यसचिव लोकदर्शन रेग्मी नेतृत्वको कार्यादललाई जिम्मा दिइएको थियो ।शनिबार सिंहदरबारमा बसेको उच्चस्तरीय समन्वय समितिले नेपालमा लकडाउन हटाउने अवस्था आइनसकेको निष्कर्ष निकाल्दै एक साता थप गर्नुपर्ने निर्णय गरेको हो ।
उच्चस्तरीय समन्वय समितिले एक सात लकडाउन थप गर्ने र त्यसपछि छिमेकी देश भारतको अवस्था हेरेर निर्णय लिने जनाएको छ । समितिले अन्तरिक र अन्तर्राष्ट्रिय हवाई उडान भने जेठ २ गतेसम्म बन्द गर्ने निर्णय गरेको छ ।
लकडाउनको समयावधि सोमवार सकिन लागेको छ । समितिले लकडाउन जारी राख्दै क्षेत्रविशेषमा अहिले लगाइएको प्रतिबन्ध केही खुकुलो पार्न सकिने निष्कर्ष निकालेको हो । खुकुलो पारिने क्षेत्रमा स्वास्थ्योपचार, कृषि र अत्यावश्यक खाद्यान्न पाइने पसलहरू रहनेछन् ।
समितिले गरेका निर्णयबारे उपप्रधानमन्त्री ईश्वर पोखरेलले प्रधानमन्त्रीलाई जानकारी गराएका मन्त्रिपरिषद स्रोतले जनाएको छ ।
पुराना संक्रमित निको भएर घर फर्कने क्रम बढे पनि नयाँ संक्रमित थपिने क्रम नरोकिएका कारण लकडाउन थप गर्ने निर्णयमा उच्चस्तरीय समिति पुगेको हो । लकडाउनको अवधि थप गर्नेबारे आइतबार बस्ने मन्त्रिपरिषदको बैठकले औपचारिक निर्णय गर्नेछ ।
